દક્ષિણ આફ્રિકા સામેની વનડે શ્રેણી માટે ટીમ ઈન્ડિયામાં ફેરફાર, બે ખેલાડીઓનો સમાવેશ

• દક્ષિણ આફ્રિકામાં સામેની ટેસ્ટ શ્રેણી બાદ ભારતીય ક્રિકેટ ટીમ વનડે શ્રેણી રમશે

દિલ્હી : દક્ષિણ આફ્રિકામાં સામેની ટેસ્ટ શ્રેણી બાદ ભારતીય ક્રિકેટ ટીમ વનડે શ્રેણી રમશે.આ શ્રેણી માટે ભારતીય ટીમની જાહેરાત 31 ડિસેમ્બરે કરવામાં આવી હતી.હવે આ ટીમમાં ફેરફાર કરવામાં આવ્યો છે અને તેમાં બે ખેલાડીઓનો સમાવેશ કરવાનો નિર્ણય લેવામાં આવ્યો છે.સ્પિન ઓલરાઉન્ડર વોશિંગ્ટન સુંદર કોરોના સંક્રમણને લીધે બહાર થતાં પસંદગીકારોએ આ નિર્ણય લીધો છે.

દક્ષિણ આફ્રિકા સામે રમાનારી વનડે શ્રેણી માટે ટીમ ઈન્ડિયામાં બે ફેરફાર કરવામાં આવ્યા છે.ઓલરાઉન્ડર જયંત યાદવ અને ઝડપી બોલર નવદિવ સૈનીનો ટીમમાં સમાવેશ કરવામાં આવ્યો છે.સુંદર કોરોના સંક્રમિત હોવાના કારણે સમગ્ર શ્રેણીમાંથી બહાર થઈ ગયો છે.બેંગ્લોર કેમ્પમાં દક્ષિણ આફ્રિકાના પ્રવાસે જતા પહેલા તેનો કોરોના ટેસ્ટ પોઝિટિવ આવ્યો હતો.સુંદર 12 ડિસેમ્બર બુધવારના રોજ દક્ષિણ આફ્રિકાના પ્રવાસ માટે બાકીની ટીમ સાથે કેપટાઉન જવાનો હતો.

ટેસ્ટ શ્રેણી દરમિયાન ઈજાગ્રસ્ત થયેલા ઝડપી બોલર મોહમ્મદ સિરાજના સ્થાને નવદીપ સૈનીને દક્ષિણ આફ્રિકા મોકલવાનો નિર્ણય લેવામાં આવ્યો છે.સિરાજ જોહનિસબર્ગમાં રમાયેલી બીજી ટેસ્ટ મેચ દરમિયાન ઈજાગ્રસ્ત થયો હતો.પસંદગીકારોએ સુંદરના સ્થાને જયંત અને સિરાજની જગ્યાએ નવદીપના નામની જાહેરાત કરી છે.

ભારતીય ટીમ 19,21 અને 23 જાન્યુઆરીએ સાઉથ આફ્રિકા સામે વનડે મેચ રમશે.પ્રથમ બે મેચ પર્લમાં રમાશે જ્યારે છેલ્લી મેચ કેપટાઉનમાં રમાશે.