પ્રચારની અનોખી સામગ્રી:યુપીની ચૂંટણીમાં મોદી-યોગીની તસવીરો પ્રિન્ટ કરેલી સુરતની સાડીઓ વહેંચાશે, ભાજપની જીત માટે નિઃશુલ્ક વિતરણ થશે

• સ્લોગન, તસવીરો અને અયોધ્યા થીમ પર સાડી મોકલશે

ઉત્તર પ્રદેશમાં ભારતીય જનતા પાર્ટીને ફરીથી બીજી વખત જીતાવવા માટે સુરતના વેપારીઓ દ્વારા અનોખી સાડી બનાવવામાં આવી છે.વેપારીઓ ભાજપનો પ્રચાર કરશે એટલું જ નહીં,પણ 1000 સાડી પૂર્વાચલ અને પશ્ચિમ યુપીમાં નિઃશુલ્ક રીતે મહિલાઓને આપવામાં આવશે.

જો રામ કો લાએ હે.હમ ઉનકો લાયેંગે.ફિર સે ઉત્તર પ્રદેશ મેં ભગવા લહરાએંગે.ના સ્લોગન સાથે સુરતના વેપારીઓ દ્વારા સાડી બનાવવા આવી છે. સાડીના પલ્લુંમાં ઉત્તર પ્રદેશના મુખ્યમંત્રી યોગી આદિત્યનાથ અને વડાપ્રધાન નરેન્દ્ર મોદીના ફોટો સાથે કમળનો ફોટો લગાવી ભાજપનો પ્રચાર કરવામાં આવશે.

1000 સાડી મોકલવામાં આવશે : ટેક્સટાઇલ યુવા બ્રિગેડના પ્રમુખ લલિત શર્માએ માહિતી આપતા જણાવ્યું હતું કે,જેવી રીતે 70 વર્ષમાં પ્રથમ વખત અયોધ્યામાં ભવ્ય મંદિરનું નિર્માણ થઈ રહ્યું છે.તેનો સંપૂર્ણ શ્રેય ભાજપ અને નરેન્દ્ર મોદીને જાય છે.એટલા માટે આ વખતે ફરીથી ઉત્તર પ્રદેશમાં ભાજપની સરકાર બને તે માટે સુરતમાંથી થ્રી-ડી પ્રિન્ટ અને ડિજિટલ પ્રિન્ટ સાડી ઓર્ડર પર બનાવવામાં આવશે. જે યુપી મોકલવામાં આવશે.પ્રથમ 1000 સાડી અન્ય સમાજની મહિલાઓને મફતમાં આપવામાં આવશે.ત્યારબાદ ઓર્ડર પ્રમાણે સુરતથી સાડી મોકલવામાં આવશે.