– લગભગ તે નિશ્ચિત મનાય છે કે આ વખતે આઇપીએલ ભારતના તમામ સ્ટેડિયમોમાં નહીં રમાય
દિલ્હી : IPL 2022 માટે આગામી 12 અને 13 ફેબ્રુઆરીના રોજ મેગા ઓક્શન યોજાશે,પરંતુ આઈપીએલની આગામી સિઝન ક્યાં રમાશે તે હજુ નક્કી નથી.બીસીસીઆઇ પાસે ઘણા બધા વિકલ્પો છે.દક્ષિણ આફ્રિકાથી લઈને શ્રીલંકાએ તેની યજમાનીમાં રસ દાખવ્યો છે.પરંતુ એવું કહેવામાં આવી રહ્યું છે કે બીસીસીઆઇ એ હજુ સુધી એ નક્કી નથી કર્યું કે આઇપીએલ ક્યાં રમાશે?
બીસીસીઆઇ પ્રયાસ કરી રહ્યું છે કે,આઇપીએલ ભારતમાં જ રમાય,પરંતુ એ પણ નિશ્ચિત છે કે આ વખતે આઇપીએલ ભારતના તમામ સ્ટેડિયમોમાં નહીં રમાય.હવે ચર્ચા છે કે,આઈપીએલની આખી સિઝન મુંબઈમાં જ રમાઈ શકે છે.તમામ મેચો મુંબઈના ત્રણ સ્ટેડિયમમાં રમાઇ શકે છે.
ટેલિગ્રાફના એક અહેવાલમાં કહેવામાં આવ્યું છે કે,તમામ આઇપીએલ મેચો માત્ર મુંબઈમાં જ યોજવામાં આવી શકે છે,બીસીસીઆઈએ આ અંગે નિર્ણય કરી લીધો છે,પરંતુ હજુ સુધી જાહેરાત કરી નથી.એવું માનવામાં આવે છે કે 20 ફેબ્રુઆરી સુધી હરાજી બાદ તેની સત્તાવાર જાહેરાત કરવામાં આવશે. ટેલિગ્રાફે સૂત્રોના હવાલાથી જણાવ્યું છે કે,બીસીસીઆઈ મુંબઈથી આગળ જોઇ રહ્યું નથી.ભારતમાં ચાલી રહેલી કોરોનાની ત્રીજી લહેર હવે ધીમી પડી રહી છે,તેથી વિદેશમાં આઇપીએલ યોજવાની જરૂર નથી.
કહેવામાં આવી રહ્યું છે કે,મુંબઈમાં ત્રણ સ્ટેડિયમ છે જેમાં તમામ મેચો યોજાઈ શકે છે.આમાં વાનખેડે સ્ટેડિયમ,ડીવાય પાટીલ અને બ્રેબોર્ન સ્ટેડિયમનો પણ ઉપયોગ કરવામાં આવશે.એવું પણ કહેવામાં આવ્યું છે કે જો જરૂર પડશે તો પુણેમાં પણ કેટલીક મેચો યોજવામાં આવી શકે છે.મુંબઈના ત્રણેય સ્ટેડિયમની આસપાસ બાયો બબલ બનાવવામાં આવશે અને તેમાં કોઈપણ બહારની વ્યક્તિને પ્રવેશવાની મંજૂરી આપવામાં આવશે નહીં.
