નવી દિલ્હી, તા. 23 માર્ચ 2022, બુધવાર : IPL 2022 શરૂ થવામાં હવે ત્રણ જ દિવસ બાકી છે. 26 માર્ચે પ્રથમ મેચમાં ચેન્નાઈ સુપર કિંગ્સ સામે કોલકાતા નાઈટ રાઈડર્સ ટકરાશે.આ પહેલા બંને ટીમ પ્રેક્ટિસમાં વ્યસ્ત હતી.કેપ્ટન મહેન્દ્ર સિંહ ધોની સહિત ચેન્નાઈના તમામ ખેલાડીઓ જોરદાર પ્રેક્ટિસ કરી રહ્યા છે.
આ દરમિયાન ટીમ ઈન્ટ્રા સ્ક્વોડ બનાવીને મેચ પણ રમી રહી છે.ચેન્નાઈનો આવી જ રીતે પ્રેક્ટિસ કરતો એક વીડિયો પણ સામે આવ્યો છે.આ વીડિયોમાં CSKનો એક યુવા ક્રિકેટર ઘણી હેડલાઈન્સ બનાવી રહ્યો છે.
આ ખેલાડી બીજું કોઈ નહીં પણ મુંબઈનો લેગ સ્પિનર પ્રશાંત સોલંકી છે.
CSKએ મેગા ઓક્શનમાં પ્રશાંત સોલંકીને 12.20 કરોડની બેઝ પ્રાઈસમાં ખરીદ્યો હતો.આવી સ્થિતિમાં પ્રેક્ટિસ સેશન દરમિયાન સોલંકી પોતાની પ્રભાવશાળી બોલિંગથી ખૂબ જ ચર્ચામાં છે.સોલંકીની ખાસ વાત એ છે કે,તેની એક્શન ઓસ્ટ્રેલિયાના ભૂતપૂર્વ મહાન સ્પિનર શેન વોર્ન જેવી છે.સોશિયલ મીડિયા પર ચાહકો સોલંકીને ધોનીનો ‘શેન વોર્ન’ પણ કહી રહ્યા છે.
CSKના યુટ્યુબ પર શેર કરવામાં આવેલા વિડિયોમાં,સોલંકી તેના ઘાતક લેગ સ્પિન બોલથી રવિન્દ્ર જાડેજાને પરેશાન કરતો જોવા મળ્યો હતો.બોલિંગમાં તેને જે વળાંક લીધો તે જોઈને ચાહકોને શેન વોર્ન યાદ આવ્યા હતા.વોર્નનું તાજેતરમાં થાઈલેન્ડમાં નિધન થયું હતું.સોલંકીને જોઈને CSKના ચાહકોને વિશ્વાસ છે કે,આ વખતે આ છોકરો IPLમાં મોટું નામ બનાવશે.
થોડા દિવસો પહેલા ચેન્નાઈ સુપર કિંગ્સે (CSK) પણ ઈન્સ્ટાગ્રામ એકાઉન્ટ પર સોલંકીની તસવીર શેર કરી હતી. CSKએ કેપ્શનમાં લખ્યું – ‘ચેતવણી’: અમે આ એક્શન પહેલા જોઈ છે.(WARNE-ING: We’ve all seen this before!)
સોલંકીની ઉંમર માત્ર 21 વર્ષ છે.તેમણે ગયા વર્ષે પુડુચેરી સામે મુંબઈ માટે લિસ્ટ-એમાં ડેબ્યૂ કર્યું હતું.સોલંકીએ અત્યાર સુધી નવ લિસ્ટ-એ મેચમાં 21 વિકેટ લીધી છે. 48 રનમાં પાંચ વિકેટમાં તેમનું સર્વશ્રેષ્ઠ પ્રદર્શન જોવા મળ્યુ છે.
