– મહારાષ્ટ્રની ઠાકરે સરકારને જોરદાર આંચકો
– એક હજાર 34 કરોડ રૃપિયાના પત્રાચાળ કૌભાંડમાં ઈડીની કાર્યવાહી
– અગાઉ રાઉતની પત્નીની પૂછપરછ અને નજીકના સાથીદારની ધરપકડ થઈ હતી
મુંબઇ : મહારાષ્ટ્રની મહાવિકાસ આઘાડી સરકારને એન્ફોર્સમેન્ટ ડિરેક્ટોરેટ (ઈડી)એ વધુ એક જોરદાર આંચકો આપ્યો છે.એનસીપી નેતા અનિલ દેશમુખ અને નવાબ મલિકની ધરપકડ અને મુખ્ય પ્રધાન ઉદ્ધવ ઠાકરેના સાળાની સંપતી જપ્ત કરવાના લીધે મહારાષ્ટ્રના રાજકારણમાં ખળભળાટ મચી ગયો છે ત્યારે શિવસેનાના સાંસદ અને મહાવિકાસ આઘાડી સરકાર બનાવવામાં મહત્ત્વની ભૂમિકા ભજવનારા સંજય રાઉતનો એક ફ્લેટ અને આઠ પ્લોટ મની લોન્ડરિંગના મામલામાં ઈડીએ જપ્ત કર્યો છે. આ સંપતીની કિંમત અંદાજે ૧૧ કરોડ ૧૫ લાખ રૃપિયા છે.ઈડીએ સંજય રાઉત સામે કાર્યવાહી કરતા શિવસેનામાં ચકચાર જાગી છે.બીજી તરફ રાજકીય વૈમન્સ્યને લીધે ઈડીએ કાર્યેવાહી કરી હોવાનો આરોપ કરવામાં આવી રહ્યો છે.
ગોરેગામના સિદ્ધાર્થનગરની ‘પત્રાચાળ’ની જમીનના એક હજાર ૩૪ કરોડ રૃપિયાના કૌભાંડમાં ઈડીએ ગત ફેબુ્રઆરીમાં રાઉતના નજીકના સાથીદાર અને બિઝનેસમેન પ્રવીણ રાઉતની ધરપકડ કરી હતી.અગાઉ પીએમસી બેન્ક રેકેટમાં પણ પ્રવીણની સંડોવણી સામે આવી હતી.પાલઘરમાં સફાળે ખાતે પ્રવીણ રાઉતનો રિયલ એસ્ટેટનો મોટો વ્યવસાય છે.ઈડીના અધિકારીઓએ પ્રવીણના ઘરે અને અન્ય સંબંધિત જગ્યાએ છાપો માર્યો હતો.
પીએમસી બેન્ક કૌભાંડમાં ઈડીએ પ્રવીણની ૭૨ કરોડ રૃપિયાની કિંમતની માલમતા જપ્ત કરી હતી.એચડીઆઇએલના રાકેશ વાધવાન અને સારંગે કરજ લઈ પીએમસી બેન્ક સાથે કરોડો રૃપિયાની છેતરપિંડી કરી હોવાનો આરોપ છે.આ પિતા,પુત્રની પણ ધરપકડ કરાઈ હતી.પીએમસી બેન્કના ૯૦ કરોડ રૃપિયા ચાઉં કરી ગયા હોવાનો પ્રવીણ પર આરોપ છે.સાંસદ સંજય રાઉતની પત્ની વર્ષા રાઉતના ખાતામાં પ્રવીણની પત્ની માધુરી રાઉતના ખાતામાંથી પંચાવન લાખ રૃપિયા ટ્રાન્સફર કરાયા હતા.ઈડીએ આ વ્યવહારની તપાસ કરી હતી.આ મામલામાં વર્ષા રાઉતને ઈડીએ નોટિસ આપી પૂછપરછ કરી હતી.બીજી તરફ પ્રવીણની કંપનીનો એચડીઆઇએલ સાથે સંબંધ હતો.પત્રાચાળ કૌભાંડની તપાસ દરમિયાન સંજય રાઉત સંબંધિત માહિતી મળી હોવાનું કહેવાય છે. આ કૌભાંડના પૈસાથી અલિબાગમાં માલમતા ખરીદવામાં આવી હોવાની ઈડીને શંકા છે.આમ છેવટે ઈડીએ સંજય રાઉતના અલીબાગના આઠ પ્લોટ અને દાદરનો ફ્લેટ જપ્ત કર્યો છે.
મની લોન્ડરિંગ પ્રકરણમાં ઈડીએ મહારાષ્ટ્રના ભૂતપૂર્વ ગૃહપ્રધાન અનિલ દેશમુખ,પ્રધાન નવાબ મલિકની ધરપકડ કરી છે.આર્થિક ભ્રષ્ટાચારના મામલામાં નેતાઓ સામે ઈડી સતત કડક પગલા ભરી રહી છે.
