મુંબઇ : વરલીના દરિયાકાંઠે સ્થિત મુંબઇની પ્રખ્યાત હાજી અલી દરગાહનો સમય મુલાકાતીઓ માટે બદલાયો છે.આજે મંગળવારે ઇદ-અલ ફિત્રના અવસરે તેમજ બુધવાર અને ગુરુવારે અમુક સમય માટે દરગાહ મુલાકાતીઓ માટે બંધ રહેશે તેવી માહિતી તાડદેવ પોલીસ સ્ટેશન પાસેથી મળી છે.દરગાહની મુલાકાતનો સમય બે દિવસ ભારે ભરતીને કારણે બદલવામાં આવ્યો છે.હાજી અલી દરગાહ મંગળવારે બપોરે ૧૨.૩૦ થી ત્રણ વાગ્યા સુધી બંધ રહેશે.બુધવારે બપોરે ૧.૧૫ થી ૩.૩૦ વાગ્યા સુધી અને ગુરુવારે બપોરે ૨ થી ૪ વાગ્યા સુધી બંધ રહેશે તેવી માહિતી દરગાહ સત્તાવાળાઓએ તાડદેવ પોલીસ સ્ટેશનને આપી હતી.શ્રદ્ધાળુઓની સુરક્ષાને ધ્યાનમાં રાખીને આ નિર્ણય લેવાયો છે.આગામી બે ગુરુવાર સુધી દરગાહના પ્રવેશ દ્વાર બહાર ભારે પોલીસ સિક્યુરીટી તહેનાત કરાશે.
