– સમાધાન મામલે મોઢું બંધ રાખવા માટે ત્રાસ અપાતો હોવાના આક્ષેપ સાથે નવસારી મહિલા પોલીસમાં ફરિયાદ
નવસારી : નવસારી રહેતી પરિણીતાએ સુરત ખાતેનાં સાસરિયાંઓ વિરૂદ્ધ શારીરિક-માનસિક ત્રાસ આપવાના અને જેઠના મર્ડર મામલે કથિત રીતે મળેલા 15 કરોડ મામલે મોઢું બંધ રાખવા માટે ત્રાસ અપાતો હોવાના આક્ષેપ સાથે નવસારી મહિલા પોલીસમાં કેસ દાખલ કરાવ્યો હતો.જેને લઈને નવસારી મહિલા પોલીસે તેણીના પતિ,જેઠ અને નણંદની ધરપકડ કરી છે. જો કે પોલીસે રૂપિયા 15 કરોડના સમાધાન અંગે પૂછતાંછ કરતા સાસરિયાઓએ એ વાત ઉપજાવેલી હોવાનું જણાવ્યું હતી.
નવસારીના ચારપુલ ખાતે રહેતી રૂકસારના લગ્ન સુરતના ઝાંપા બજાર ખાતે રહેતા ફિરોઝ ગુલામ મોહમ્મદ શેખ સાથે 2010માં થયા હતાં.ત્યારે લગ્નના થોડા જ દિવસોમાં બાળક ન થવાના કારણોસર પારિવારિક ઝઘડા અને મેણાં ટોણાં મારી પરિણીતાને હેરાન કરવાનું શરૂ કર્યું હતું. સાસરિયાઓ ત્રાસ આપવાનું શરૂ કર્યા બાદ તેણીને બાળક સાથે નવસારી તેણીના પિયર મોકલી આપી હતી.જેથી આ મામલે મહિલાએ 498અ અંતર્ગત નવસારી મહિલા પોલીસ સ્ટેશનમાં સાસરિયાઓ વિરૂદ્ધ ફરિયાદ આપી છે. આ કેસમાં વિવાદિત બંધ થયેલો વસીમ બિલ્લાં કેસના વિવાદનો જન્મ થયો હતો.જેમાં પરિણીતાએ સુરતના આરોપી બદરી લેસવાળાએ મૃતક બિલ્લાના પરિવારને સમાધાનના 15 કરોડ રૂપિયા આપ્યા હોવાનો ઉલ્લેખ FIRમાં કરતાં નવા વિવાદે જન્મ લીધો હતો.
શું હતી સમગ્ર ઘટના?
23 જાન્યુઆરી 2020ના રોજ નવસારી શહેરની લગોલગ આવેલા છાપરા ગામની મણીનગર સોસાયટી પાસે આવેલા બોસ જીમમાં વસીમ બિલ્લા નામનો ઈસમ પોતાની રોજિંદી કસરત કરીને કારમાં બેસીને ઘરે જવા નીકળ્યો હતો.જ્યાં બાઇક સવાર 4 ઈસમોએ તેની સાથે રકઝક કરી વસીમ બીલ્લાને ગોળી મારી પલાયન થઈ ગયા હતા.વસીમ બીલ્લા સુરતની ભાઈ લોગ જમાતમાં મોટું નામ ધરાવતો હતો.મુંબઈની ફિલ્મી હસ્તીઓ સાથે પણ તે સારો સંબંધ ધરાવતો હતો.ગુનાની દુનિયામાં સંડોવણીના કારણે અમુક લોકો સાથે અંગત અદાવત હોવાથી આધારભૂત સૂત્રો પ્રમાણે રૂપિયાની લેતી દેતીમાં હત્યા થઈ હોવાનું અનુમાન પણ લગાવવામાં આવ્યું હતું.
આ સમગ્ર કેસમાં સુરતના બદરી લેસવાળાનું નામ આરોપમાં ઉછળ્યું હતું અને તેને આ કેસમાં શરૂઆતમાં આરોપી બનાવમાં આવ્યો હતો.પણ બદ્રીના કર્મચારીએ પોતાના શેઠને વસીમ બિલ્લો હેરાન કરતો હોવાનું કહીને તેણે જ મર્ડર કર્યું હોવાની વાત બહાર આવી હતી અને મામલો ઠંડો થયો હતો.પણ વસીમના નાનાભાઇની પત્નીએ તેના પરિવાર પર સમાધાનના પેટે 15 કરોડ રૂપિયાની વાત FIRમાં દાખલ કરતાં ફરીવાર બંધ થયેલા વસીમ બિલ્લા કેસની ચર્ચા શરૂ થઈ હતી.
મર્ડરમાં આરોપી પકડાઇ જતાં આ કેસ બંધ થયો હતો પરંતુ પરિણીતાએ રૂપિયા 15 કરોડનો ઘટસ્ફોટ કરતાં ફરીવાર વસીમ બિલ્લાની ફાઈલ ખુલે અને તેમાં તપાસ કરનાર અધિકારીઓ આરોપીઓ સામે પણ શંકાની સોય ટાંકવામાં આવી રહી છે.જો કે પોલીસે આ મામલે સાસરિયાંઓની ધરપકડ કરી છે.
