નવી દિલ્હી : દેશનો જીડીપી ગ્રોથ જાન્યુઆરી-માર્ચના ક્વાર્ટર (Q4)માં 4.1 ટકા રહ્યો હતો.સમગ્ર વર્ષ 2021-22નો જીડીપી ગ્રોથ 8.7 ટકા રહ્યો હતો. વિતેલા વર્ષના ચાર ક્વાર્ટર પૈકી Q4માં સૌથી નીચો ગ્રોથ જોવાયો છે.નેશનલ સ્ટેટિસ્ટિકલ ઓફિસ (NSO)એ મંગળવારે આ ડેટા જાહેર કર્યા હતા.અગાઉના વર્ષ 2020-21માં કોરોનાને કારણે જીડીપીમાં 6.6 ટકા નેગેટિવ ગ્રોથ જોવાયો હતો.એનએસઓના ડેટા અનુસાર વિતેલા વર્ષ 2021-22માં પ્રથમ ક્વાર્ટર (Q1)માં જીડીપી ગ્રોથ 20.1 ટકા રહ્યો હતો,Q2માં 8.4 ટકા,Q3માં 5.4 ટકા રહ્યો હતો.Q4માં સૌથી ઓછો 4.1 ટકા ગ્રોથ જોવાયો છે.અગાઉના વર્ષે Q4માં 2.5 ટકા જીડીપી ગ્રોથ જોવાયો હતો.અગાઉ એનએસઓએ ગત ફેબ્રુઆરીમાં રજૂ કરેલા બીજા અંદાજમાં 2021-22 માટે 8.9 ટકા જીડીપી ગ્રોથનો અંદાજ આપ્યો હતો.આમ,તેના કરતાં પણ વાસ્તવિક ગ્રોથ નીચો આવ્યો છે.સંસદમાં ફેબ્રુઆરીમાં રજૂ કરાયેલા આર્થિક સર્વેક્ષણમાં નવા વર્ષ 2022-23 માટે 8-8.5 ટકા જીડીપી ગ્રોથનો અંદાજ અપાયો છે.એનએસઓના ડેટા અનુસાર 2021-22માં દેશનું રિયલ જીડીપી~147.36 લાખ કરોડ થયું હતું,જે 2020-21માં ~135.58 લાખ કરોડ હતું.ગ્રોસ વેલ્યૂ એડેડ(GVA)ગ્રોથ 2021-22માં 8.1 ટકા રહ્યો હતો,જે અગાઉના વર્ષે નેગેટિવ 4.8 ટકા હતો.
મેન્યુફેક્ચરિંગ સેક્ટરમાં GVA ગ્રોથ 9.9 ટકા રહ્યો હતો.અગાઉના વર્ષે તેમાં 0.6 ટકા નેગેટિવ ગ્રોથ નોંધાયો હતો.માઈનિંગ અને કન્સ્ટ્રક્શન બન્ને સેક્ટરમાં GVA ગ્રોથ 11.5 ટકા રહ્યો હતો.અગાઉના વર્ષે આ બન્ને મોટા સેક્ટરમાં કોરોનાને કારણે નેગેટિવ ગ્રોથ જોવાયો હતો.જોકે કૃષિ ક્ષેત્રે ગ્રોથ સાધારણ ઘટીને 3 ટકા થયો હતો,જે અગાઉના વર્ષે 3.3 ટકા હતો.2021-22માં વીજળી,ગેસ,વોટર સપ્લાય અને અન્ય યુટિલિટી સર્વિસીઝ સેગમેન્ટમાં 7.5 ટકા ગ્રોથ જોવાયો હતો.આ સેગમેન્ટમાં અગાઉના વર્ષે 3.6 ટકાનો નેગેટિવ ગ્રોથ જોવાયો હતો.સર્વિસીઝ સેક્ટર(ટ્રેડ,હોટેલ,ટ્રાન્સપોર્ટ,કમ્યૂનિકેશન અને બ્રોડકાસ્ટિંગ)માં 11.1 ટકા ગ્રોથ જોવાયો હતો. અગાઉના વર્ષે તેમાં 20.2 ટકા નેગેટિવ ગ્રોથ જોવાયો હતો.ફાઈનાન્શિયલ રિયલ એસ્ટેટ અને પ્રોફેશનલ સર્વિસીઝ સેક્ટરમાં 4.2 ટકા ગ્રોથ જોવાયો હતો.અગાઉના વર્ષે તેમાં 2.2 ટકા ગ્રોથ રહ્યો હતો.પબ્લિક એડમિનિસ્ટ્રેશન,ડિફેન્સ અને અન્ય સર્વિસીઝમાં 12.6 ટકા ગ્રોથ જોવાયો હતો,જેમાં અગાઉના વર્ષે 5.5 ટકા નેગેટિવ ગ્રોથ જોવાયો હતો.
નોમિનલ જીડીપી(અર્થાત્ જીડીપી એટ કરન્ટ પ્રાઈસીસ)2021-22માં ~236.65 લાખ કરોડ થઈ હતી,જે અગાઉના વર્ષે ~198.01 લાખ કરોડ હતી.આમ,તેમાં 19.5 ટકા ગ્રોથ જોવાયો છે.એનએસઓના ડેટા અનુસાર માથાદીઠ વાર્ષિક આવક(નેટ નેશનલ ઈન્કમ મુજબ)2021-22માં ~1.5 લાખ થઈ છે,જે 2020-21માં રૂ.1,26,855 હતી.આમ,તેમાં 18.3 ટકાનો વધારો થયો છે.જોકે કોન્સ્ટન્ટ પ્રાઈસ મુજબ માથાદીઠ વાર્ષિક આવક 7.5 ટકા વધીને~91,481 થાય છે,જે અગાઉના વર્ષે ~85,110 હતી.
