બારડોલી : ખેડૂત સહકારી જીનીંગ એન્ડ પ્રેસીંગ સોસાયટી લી.(બાબેન જીન)ની વાર્ષિક 89મી વાર્ષિક સાધારણ સભા સોમવારના રોજ સહકારી અગ્રણી ભિખાભાઈ ઝેડ.પટેલના અધ્યક્ષ સ્થાને મળી હતી.સભામાં એજન્ડાના તમામ કામો સર્વાનુમતે મંજૂર કરવામાં આવ્યા હતા.આ પ્રસંગે સંસ્થાના પ્રમુખ કશ્યપભાઈ પટેલે ઉપસ્થિતિ સભાસદોને સંબોધન કરતાં જણાવ્યુ હતું કે,આપણી સંસ્થા બારડોલી,કામરેજ,પલસાણા અને વાલોડ તાલુકાનાં 74 જેટલા ગામોનો વિશાળ પરિવાર ધરાવે છે.તેમણે સંસ્થાના વાર્ષિક લેખજોખાં રજૂ કરતાં જણાવ્યુ હતું કે,સંસ્થાએ વર્ષ દરમ્યાન 74.66 કરોડ રૂપિયાનું વેચાણ કર્યું છે.
આ ઉપરાંત 8.74 કરોડના સીએનજી ગૅસનું પણ વેચાણ કરી 51.53 લાખ રૂપિયાનું કમિશન મેળવ્યું છે.સંસ્થાએ વર્ષ દરમ્યાન 7.12 કરોડ રૂપિયાનું પુલિંગ ડાંગરનું કામકાજ કર્યું છે.આમ ચાલુ વર્ષે કુલ 90.53 કરોડનો વેપાર સંસ્થાએ કર્યો હોવાની જાણકારી તેમણે આપી હતી.તેમણે સંસ્થા દ્વારા બનાવવામાં આવતા વિવિધ ખાતરો બાબતે પણ વિસ્તારથી જાણકારી આપી તેનો વધુમાં વધુ ઉપયોગ કરવા જણાવ્યુ હતું.હાલમાં સંસ્થા દ્વારા નવસારી યુનિવર્સિટી સાથે MOU કરી ખેડૂત છાપ ઓર્ગેનિક લિક્વિડ ન્યુટ્રિએંટ્રસ પ્લાન્ટ શરૂ કર્યો છે.જે પણ સભાસદોને રાહત દરે આપવામાં આવી રહ્યો હોવાનો તેમણે ઉલ્લેખ કર્યો હતો. સંસ્થાના મેનેજેર ભુપેન્દ્રસિંહ સોલંકીએ ગત વર્ષની સામાન્ય સભાની કાર્યવાહીનું વાંચન કર્યું હતું.સમગ્ર સભાનું સંચાલન અધ્યક્ષ ભિખાભાઈ પટેલે કર્યું હતું.આ પ્રસંગે ભિખાભાઈ પટેલનું ગુજકોમાસોલમાં ડિરેક્ટર પદે વરણી થવાથી તેમનું સમ્માન કરવામાં આવ્યું હતું.
