બારડોલી : સુરત જિલ્લાના કામરેજ તાલુકાનાં નવીપારડી ગામની સીમમાં આવેલ વિદ્યામંગલ નિવાસી શાળાની હોસ્ટેલમાંથી એક બાળક ગુમ થઈ ગયો હતો.બાળક ધોરણ-6 માં અભ્યાસ કરતો હતો.ઘટનાની જાણ થતાં જ કામરેજ પોલીસે ગુમ બાળકને ગણતરીના કલાકોમાં શોધી કાઢી તેનો કબ્જો તેના પિતા અને શાળાના પ્રિન્સિપાલને સોંપ્યો હતો.
પ્રાપ્ત માહિતી મુજબ ભરુચ જિલ્લાના આમોદ તાલુકાનાં ઓચ્છણ ગામે રહેતા સુરેન્દ્રગીરી હસમુખગીરી ગૌસ્વામી કે જેઓ ખેતી કરી પરિવારનું ગુજરાન ચલાવે છે.તેમનો 11 વર્ષીય પુત્ર નક્ષગીરીને કામરેજ તાલુકાનાં નવીપારડી ગામે આવેલ વિદ્યામંગલ નિવાસી શાળામાં અભ્યાસ માટે મૂક્યો હતો.તે ધોરણ-6 માં અભ્યાસ કરે છે.ગતરોજ રમત ગમતના પીરિયડ દરમ્યાન નક્ષ સાંજના પાંચેક વાગ્યાની આજુબાજુ સ્કૂલ કેમ્પસમાંથી કોઈને જાણ કર્યા વગર ક્યાંક જતો રહયો હતો.જે બાબતે શાળાના આચાર્યએ વાલી તેમજ કામરેજ પોલીસને જાણ કરતાં પોલીસે ગુમ બાળકની શોધખોળ કરતાં ગુમ થનાર નક્ષને ગણતરીના કલાકોમાં શોધી કાઢ્યો હતો.અને તેના વાલી તેમજ પ્રિન્સિપાલને કબ્જો સોંપ્યો હતો.
