નવી િદલ્હી : લશ્કરની ત્રણેય પાંખના વડાએ મંગળવારે જણાવ્યું હતું કે,અગ્નિપથ યોજનામાં જવાનો હાલની ભરતી પ્રક્રિયામાં કોઇ ફેરફાર નહીં થાય.તેને લીધે તેમની યુદ્ધ ક્ષમતા અને અન્ય તૈયારી પર પણ કોઇ પ્રતિકૂળ અસર નહીં પડે.સંરક્ષણ મંત્રાલયના લશ્કરી બાબતોના વિભાગના એડિશનલ સેક્રેટરી લેફ્ટેનન્ટ જનરલ અનિલ પુરીએ નવી યોજના અંગે ઊભા થયેલા ઘણા પ્રશ્નોનો જવાબ આપ્યો હતો.તેમણે ભારપૂર્વક જણાવ્યું હતું કે,“યોજનાનો હેતુ લશ્કરી દળોમાં ઘટાડો કરવાનો નહીં,તેમની સરેરાશ વય ઘટાડવાનો અને એકંદર ક્ષમતામાં વધારો કરવાનો છે.”
એર ઓફિસર ઇન ચાર્જ ઓફ પર્સોનેલ એર માર્શલ એસ કે ઝાએ જણાવ્યું હતું કે,“અગ્નિપથ હેઠળ એર ફોર્સની ભરતી પ્રક્રિયા,લાયકાત,પરીક્ષાના અભ્યાસક્રમ અને તબીબી ધોરણોમાં કોઇ ફેરફાર નહીં થાય. ભારતીય એરફોર્સમાં તમામ નોંધણી અગ્નિવીર વાયુ દ્વારા જ કરાશે.”આર્મીના એડજ્યુટન્ટ જનરલ લેફ્ટેનન્ટ જનરલ બંસી પોનપ્પાએ જણાવ્યું હતું કે,અગ્નિપથ યોજના હેઠળ મહિલાઓની મિલિટરી પોલિસ તરીકે ભરતી કરાશે.
ઉમેદવારોનું ઓનલાઇન રજિસ્ટ્રેશન અને ભરતીના સમયપત્રકની જાહેરાત પહેલી જુલાઇથી શરૂ થશે.તેમણે કહ્યું હતું કે,ભરતી મેળો ઓગસ્ટના બીજા સપ્તાહથી શરૂ થશે.જ્યારે અગ્નિવીરની પ્રથમ બેચ માટે સંયુક્ત એન્ટ્રન્સ પરીક્ષા ૧૬ ઓક્ટોબર અને ૧૩ નવેમ્બરે યોજાશે.તેમણે ૨૨ ડિસેમ્બરે જે તે ટ્રેનિંગ સેન્ટર્સમાં હાજર થવાનું રહેશે.પહેલી બેચ તેમના યુનિટ સાથે ૨૩ જુલાઇથી જોડાશે.બીજી બેચની કોમન એન્ટ્રન્સ પરીક્ષા ૨૩ જાન્યુઆરીએ થશે.એર માર્શલ ઝાએ જણાવ્યું હતું કે,એરફોર્સમાં ઉમેદવારોની નોંધણી ૨૪ જૂનથી ૫ જુલાઇના ગાળામાં કરાશે.નેવીની રજિસ્ટ્રેશન પ્રક્રિયાની માહિતી બુધવારે જાહેર થશે. તમામ ઉમેદવારો માટે ઓનલાઇન નોંધણી પહેલી જુલાઇથી શરૂ થશે.
