સુરત : ડુમ્મસ રોડ મોન્ટેસા કોર્મશીયલ બિલ્ડીંગ પાસે પાર્ક બ્રેઝા કારના કાચ તોડી તેમાંથી કારની ચાવી ચોરી કર્યા બાદ ચોર પાર્લેપોઇન્ટ સરગમ શોપીંગ સેન્ટર પાસે પાર્ક સીઆઝ કાર ચોરીને રફુચક્કર થઇ ગયાની ફરીયાદ ઉમરા પોલીસમાં નોંધાય છે.બમરોલી-વડોદ રોડ પર પેટ્રોલપંપ ધરાવતા ભદ્રેશ ઠાકોરદાસ સોપારીવાલા(રહે.32 સ્વસ્તીક એન્કલેવ,આર્શીવાદ રેસીડન્સી,ન્યુ સિટીલાઇટ રોડ,સુરત)સોમવારે વ્હેલી સવારે પોતાની સિઆઝ કાર નં.જીજે-5 જેઆર-2655 પાર્લેપોઇન્ટ સરગમ શોપીંગ સેન્ટર પાસે પાર્ક કરી મિત્ર ચંદ્રેશ કાપડીયા સાથે અન્ય મિત્ર મુકેશ લાકડાવાળાની બ્રેઝા કારમાં ડુમ્મસ રોડ પર મોન્ટેસા કોર્મશીયલ બિલ્ડીંગ પાસે કાર પાર્ક કરી તેઓ વોર્કીંગ કરવા ડુમ્મસ ગયા હતા.
ડુમ્મસથી તેઓ સિટીબસમાં પરત આવ્યા ત્યારે મુકેશ લાકડાવાળાની બ્રેઝા કાર નં.જીજે-5 જેએસ-9886 નો કાચ તોડી ચોર તેમાંથી ભદ્રેશની સિઆઝ કારની ચાવી ચોરી ગયા હતા.જેથી ભદ્રેશે તેના ભાઇ પાસે કારની બીજી ચાવી મંગાવી પાર્લેપોઇન્ટ ગયા હતા.પરંતુ પાર્લેપોઇન્ટ પહોંચ્યા ત્યારે ત્યાંથી ભદ્રેશની સીઆઝ કાર પણ ચોરી થઇ ગઇ હતી.જેથી ચોંકી જનાર ભદ્રેશ સોપારીવાલાએ આ અંગે ઉમરા પોલીસમાં ફરીયાદ નોંધાવી હતી.
