વડોદરા : વડોદરામાં કાન્હા બિલ્ડર ગ્રુપ સાથે એક સમયે સંકળાયેલા નવલ દિપક કુમાર ઠક્કર દ્વારા તેના જ સમાજની પરિચીત યુવતિ સાથે દુષ્કર્મ આચર્યો હોવાની ફરિયાદ પોલીસ ચોપડે નોંધાઇ હતી.ગત તા. 28 તારીખના રોજ ફરિયાદ નોંધાયા બાદથી તે ફરાર હતો.ગતરાત્રે નવલ ઠક્કરને ઝડપી લેવામાં આવ્યો છે. મોંધીદાટ કારમાં ફરતો દુષ્કર્મનો આરોપી નવલ ઠક્કર ઓટોરીક્ષામાં ઘર તરફ જતા પોલીસના હાથે ચઢ્યો હતો.તો બીજી તરફ કાન્હા ગ્રુપ દ્વારા જાહેર અખબાર માધ્યમોમાં નોટીસ મારફતે જણાવાયું છે કે, નવલ ઠક્કર ક્યારે પણ ગ્રુપ સાથે જોડાયેલો ન હતો.
બિલ્ડર નવલ ઠક્કરની ધરપકડ મામલે એસીપી રાધિકા ભરાઇએ મીડિયા સાથે વાત કરતા કહ્યું કે, જેપી રોડ પોલીસ મથકમાં તા. 28 ના રોજ દુષ્કર્મનો ગુનો નોંધાયો છે.અને ફરિયાદ મુજબ ફરિયાદીની દિકરી સાથે આરોપી નવલ દિપક કુમાર ઠક્કરે દુષ્કર્મ આચર્યું છે.ગુનો નોઁધાયા બાદ આરોપીને પકડવા માટે 5 ટીમો સતત કાર્યરત હતી.ગઇ કાલે રાત્રે આરોપીને પકડી પાડવામાં આવ્યો છે.આરોપી અંબાજીથી પોતાના ઘર તરફ આવી રહ્યો હતો તે દરમિયાન પોલીસની ટીમે તેને દબોચી લીધો છે. ઇલોરાપાર્ક આઇનોક્સ પાસે આવેલા શાક માર્કેટ નજીકથી રીક્ષામાંથી તેની ધરપકડ કરવામાં આવી હતી.આરોપીનો કોવિડ ટેસ્ટ કરવામાં આવ્યો છે.જેનું પરિણામ આવ્યા બાદ તેની સામે આગળની કાર્યવાહી હાથ ધરવામાં આવશે.
વધુમાં એસીપી રાધિકા ભરાઇએ જણાવ્યું કે, પીડિતાની મેડીકલ ચકાસણી કરી દેવામાં આવી છે.સીઆરપીસી 164 મુજબ ભોગ બનનારનું નિવેદન લેવામાં આવ્યું છે.હાલ સુધીની તપાસમાં ભોગ બનનારનું શી ટીમ દ્વારા કાઉન્સિલીંગ કરવામાં આવ્યું છે. આરોપીનો કોવિડ ટેસ્ટ કરાવતા પહેલા તેની પ્રાથમિક પુછપરછ કરવામાં આવી હતી.તેની અટકાયત કર્યા બાદ વિગતવાર જાણ કરવામાં આવશે.
આખરે એસીપીએ ઉમેર્યું કે, ફરિયાદમાં જણાવ્યું કે, તેણી તેના દુરના પરિચીત છે. ફરિયાદી અને આરોપી બંનેને ઓળખતા હતા.નવલ અંબાજી તથા અન્યત્રે દર્શન કરવા ગયો હતો.ટેકનીકલ ટીમ દ્વારા તથા ડીસીબી અને પીસીબી વારંવાર તેને ટ્રેસ કરવાના પ્રયાસો કરી રહી હતી.દરમિયાન ચોક્કસ બાતમી મળતા તેની અટકાયત કરી લેવામાં આવી છે.
સોશિયલ મીડિયા પ્રોફાઇલમાં નવલ ઠક્કરે લખ્યું છે, OWNER Kanha Group
દુષ્કર્મના આરોપી નવલ ઠક્કરના ઇન્સ્ટાગ્રામ પ્રોફાઇલમાં તેણે નામ નીચે OWNER Kanha Group એટલેકે કાન્હા ગ્રુપનો સંચાલક હોવાનું લખ્યું છે.તેની સાથે તેણે રીયલ એસ્ટેટ ક્ષેત્રે મોટું નામ ધરાવતા કાન્હા ગ્રુપની વેબસાઇટનો પણ ઉલ્લેખ કર્યો છે.આ લખાઇ રહ્યું છે ત્યારે સોશિયલ મીડિયા પ્રોફાઇલ આ પ્રમાણે છે.તો બીજી તરફ કાન્હા ગ્રુપ દ્વારા અગ્રણી અખબારમાં જાહેર ખુલાસો આપવામાં આવ્યો છે.જેમાં જણાવ્યું છે કે, નવલ દિપક કુમાર ઠક્કર કાન્હા ગ્રુપમાં ક્યારેય ભાગીદાર તરીકે રહેલા નથી.કે કાન્હા ગ્રુપમાં ક્યારેય ભાગીદાર તરીકે રહેલા નથી.કાન્હા ગ્રુપ સાથે કોઇ પણ રીતે જોડાણ ધરાવતા નથી.
