ચંડીગઢ : આ વર્ષના મે મહિનામાં પંજાબના જાણીતા સિંગર અને રેપર સિદ્ધૂ મૂસેવાલાને જાહેરમાં ગોળીઓ મારીને હત્યા કરવામાં આવી હતી.સિદ્ધૂ મૂસેવાલાના મોત પછી પોલીસ અને તપાસ એજન્સી સતત આરોપીઓની ધરપકડ કરી રહી છે.સાથે જ NIA જેવી તપાસ એજન્સી પણ સિદ્ધૂ મૂસેવાલા મર્ડર કેસની તપાસ કરી રહી છે.આ વચ્ચે હવે માહિતી મળી રહી છે કે સિદ્ધૂ મૂસેવાલા મર્ડર કેસમાં તેમના નજીકના મિત્ર અને પંજાબી સિંગર અફસાના ખાનનું નામ જોડાયું છે.મળતી માહિતી મુજબ NIAએ અફસાનાની આ કેસમાં પૂછપરછ કરી છે.
NIAએ અફસાના ખાનની પૂછપરછ કરી
બિગ બોસના પૂર્વ કન્સ્ટેન્ટ અને પંજાબની જાણીતી સિંગર અફસાના ખાનના નામથી સિદ્ધૂ મૂસેવાલા મર્ડર કેસમાં નવો વળાંક આવ્યો છે.લાઈવ હિન્દુસ્તાનના સમાચાર મુજબ NIA દ્વારા અફસાના ખાનને સમન મોકલવામાં આવ્યા હતા,જે અંતર્ગત મંગળવારે અફસાનાની સિદ્ધૂ મૂસેવાલા કેસને લઈને લગભગ 5 કલાક સુધી પૂછપરછ કરવામાં આવી.મળતી માહિતી મુજબ NIAને શંકા છે કે કયાંકને કયાંક જે યુવતી સિદ્ધૂ પોતાની બહેન ગણાવતો હતો,તેનું કનેક્શન સિદ્ધૂના મર્ડર કેસ સાથે છે.એવામાં આવનારા સમયમાં અફસાના ખાનની વધુ પૂછપરછ કરવામાં આવી રહી છે.આ ઉપરાંત રિપોટ્સમાં એવો પણ દાવો કરવામાં આવી રહ્યો છે કે અફસાના ખાનનું લિંકઅપ બંબીહા ગેંગ સાથે પણ છે.
અફસાનાને ધમકી ભરેલા ફોન કોલ્સની જાણકારી હતી
સિદ્ધૂ મૂસેવાલા સિંગર અફસાના ખાનને પોતાની મિત્ર તેમજ બહેન ગણતો હતો.સિદ્ધૂ મૂસેવાલા અને અફસાના ખાને અનેક ગીત સાથે મળીને પણ ગાયા. મળતી માહિતી મુજબ સિદ્ધૂ મૂસેવાલાને ધમકી ભર્યો ફોન કોલ્સની કથિત જાણકારી અફસાના ખાનને પણ આપી હતી.એટલું જ નહીં સિદ્ધૂ મૂસેવાલાએ પોતાનું છેલ્લું ગીત ‘જંદી વાર’ પણ અફસાના ખાન સાથે ગાયું હતું.જો કે કોર્ટે આ ગીત પર રોક લગાવી દીધી છે.સલમાન ખાનના બહુચર્ચિત શો બિગ બોસ-15માં અફસાના ખાન જોવા મળી હતી.
