– શોરૂમના માલિકે મહિલા કાર ચાલક સામે પોલીસ ફરિયાદ કરી
– કાર ઘૂસી જતાં શો રૂમમાં લાખો રૂપિયાનું નુકસાન થયાનો અંદાજ
વડોદરા, 19 જાન્યુઆરી 2023 ગુરૂવાર : વડોદરા શહેરમાં એક મહિલાએ ભૂલથી બ્રેકના બદલે એક્સીલેટર દબાવી દેતાં ગાડી સીધી જ દુકાનમાં ઘુસી ગઈ હોવાનો બનાવ સામે આવ્યો છે.શહેરના અલકાપુરી બી.પી.સી રોડ પર ગઈ કાલે રાત્રે એક મહિલા કારચાલકે ભુલથી બ્રેક મારવાની જગ્યાએ એક્સીલરેટર દબાવી દેતાં તેની કાર ક્રોકરી શો રૂમના પગથિયા ચડી કાચ તોડી અંદર ઘુસી ગઇ હતી.
મહિલાએ ભૂલથી બ્રેકની જગ્યાએ એક્સિલેટર દબાવી દીધું
શો રૂમ માલિકે આ મામલે કારચાલક સામે ગોત્રી પોલીસમાં ફરિયાદ નોંધાવી છે.પ્રાપ્ત વિગતો પ્રમાણે શહેરના અલકાપુરી બી.પી.સી. રોડ પર ક્રિષ્ના ક્રોકરી શો રૂમ પાસે ગઈકાલે રાત્રે એક મહિલા ખરીદી કરવા માટે ગાડી લઇને આવી હતી.મહિલાએ શો રૂમ પાસેના પાર્કિંગમાં કાર રોકવા માટે ભૂલથી બ્રેકની જગ્યાએ એક્સીલેટર દબાવી દેતાં કાર ઉછળીને શો રૂમના પાંચ પગથિયા ચડી કાચ તોડી શો રૂમમાં ઘૂસી ગઇ હતી.
શો રૂમમાં લાખો રૂપિયાનું નુકસાન થયાનો અંદાજ
આ બનાવને પગલે ક્રિષ્ના ક્રોકરીના માલિક અને સ્ટાફના માણસો એકદમ શું ધડાકો થયો તે જોવા માટે દોડી આવ્યા હતા.આ સમગ્ર બનાવ શો રૂમમાં લગાવવામાં આવેલા સીસીટીવી કેમેરામાં કેદ થયો હતો.કાર ઘૂસી જતાં શો રૂમમાં લાખો રૂપિયાનું નુકસાન થયાનો અંદાજ છે.આ મામલે મહિલા કાર ચાલક સામે ગોત્રી પોલીસ સ્ટેશનમાં ફરિયાદ નોંધાઇ છે.
