કામરેજ ,તા.02 ફેબ્રુઆરી 2023,ગુરૂવાર : સુરત જિલ્લા ક્રાઇમ બ્રાન્ચની ટીમે મંગળવારે મોડી રાતે બાતમી આધારે કામરેજના સેવણી ચાર રસ્તા પરથી વિદેશી દારૂ ભરેલો પિકપ ગાડીને ઝડપી પાડ્યો પોલીસે 1.42 લાખના વિદેશી દારૂ તેમજ ગાડી મળી 4.42 લાખનો મુદ્દામાલ કબ્જે લીધો હતો.
મળતી માહિતી અનુસાર મંગળવારના રોજ એલ.સી.બી શાખા પોલીસ પ્રોહી જુગારની પ્રવૃતી નેસ્ત નાબુદ કરવા બાબતે અલગ અલગ ટીમો બનાવી પેટ્રોલીંગમાં હતા.તે દરમ્યાન એ.એસ.આઇ મહેન્દ્રભાઇ શનાભાઇ તથા હે.કો રાજેશભાઇ બલદેવભાઇ ને સંયુક્ત રાહે બાતમી મળી હતી કે, એક સફેદ કલરનો મહિંદ્રા કંપનીનો બોલેરો પીકઅપ RJ-07-GA-0511 માં લોખંડના બેરલ માં વિદેશીદારૂનો જથ્થો ભરેલ છે અને તે બારડોલી થઈ સેવણી ચાર રસ્તા થઈ કોસમાડી પાટીયા થઈ સુરત શહેર તરફ જવાની છે.તેવી ચોકકસ બાતમી આધારે પોલીસની ટીમે કોસમાડી પાટીયા ખાતે વોચ ગોઠવી મહીન્દ્રા બોલેરો પીકઅપ ગાડીને ઝડપી લેવામાં આવ્યો હતો.ડ્રાઇવર અંધારાનો લાભ લઇ ભાગી છૂટ્યો હતો.પોલીસે ગાડીમાંથી પતરાના બેરલોમાં સંતાડેલ ભારતીય બનાવટના વિદેશી દારૂની વ્હીસ્કી બાટલી 770 નંગ બોટલ ઝડપી પાડ્યો હતો.પોલીસે 3 લાખની કિંમતની ગાડી તેમજ 1.42 લાખનો વિદેશી દારૂ મળી કુલ 4.42 લાખનો મુદ્દામાલ કબ્જે કરી ચાલકને વોન્ટેડ જાહેર કરી આરોપીઓ વિરૂધ્ધમાં કાયદેસરની કાર્યવાહી કરી વધુ તપાસ અર્થે કામરેજ પોલીસ સ્ટેશન ખાતે સોંપવામાં આવ્યો હતો.
