અંકલેશ્વર, તા.3 ફેબ્રુઆરી, શુક્રવાર : અંકલેશ્વર GIDCમાં આવેલી નીલકંઠ ગ્રુપ ઓફ ઇન્ડસ્ટ્રીઝની નવી બની રહેલી નીલકંઠ ઓર્ગેનિક્સ કંપનીના યુનિટ-3માં બાંધકામ ચાલી રહ્યું છે.અચાનક નિર્માણાધિન યુનિટ-3ના કુલિંગ ટાવરમાંથી કાળા ધુમાડા સાથે આગની લપટો દેખા દેતા અફરાતફરી ગઇ હતી.
કુલિંગ ટાવરમાં લાગેલી આગની જાણ DPMCના ફાયર ફાઈટરોને કરાતા 3 ફાયર ટેન્ડર સ્થળ ઉપર દોડી આવ્યા હતા અને પાણીનો મારો ચલાવી આગ ઉપર કાબુ મેળવ્યો હતો.નવા બની રહેલ યુનિટમાં શ્રમજીવીઓ સિવાય કોઈ હાજર ન હતું.એવા સમયે કુલિંગ ટાવરમાંથી કાળા ધૂમાડા સાથે આગની લપટો દેખાતા કામ કરી રહેલ શ્રમજીવીઓમાં અફરાતફરી મચી ગઈ હતી.અને નિર્માણધીન કુલિંગ ટાવરમાં લાકડા પડ્યા હોવાથી આગની લપટોએ મોટું સ્વરૂપ ધારણ કર્યું હતું.જોકે કુલિંગ ટાવરમાં આગ ક્યાં કારણોસર લાગી હતી તેનું રહસ્ય અંકબંધ છે.અને ફાયર ફાઈટરોની સમયસૂચકતા ના કારણે કોઈ મોટી જાનહાનિ થતા રહી ગઈ હતી.
