– એકાએક પથ્થરમારો થતા લોકોમાં દોડ ધામ મચી ગઇ,તોફાની ટોળાએ રોડ પર લારીઓ તોડી
– પોલીસે ગઈ કાલેજ બંને સમાજના અગ્રણીઓ સાથે શાંતિ સમિતીની બેઠક કરી હતી
વડોદરા, 30 માર્ચ 2023 ગુરૂવાર : આજે રામનવમી નિમીત્તે વિશ્વ હિંદુ પરિષદ અને બજરંગ દળ દ્વારા શોભાયાત્રાનું આયોજન કરવામાં આવ્યું હતું.વાજતે-ગાજતે નીકળેલી શોભાયાત્રા ફતેપુરા પાંજરીગર મહોલ્લા પાસે પહોંચતા એકાએક પથ્થરમારો થતા લોકોમાં દોડ ધામ મચી ગઇ હતી.તોફાની ટોળા દ્વારા રોડ પર લારીઓની પણ તોડફોડ કરી હતી.રોડ ઉપરના બજારો ટપોટપ બંધ થઇ ગયા હતા.જોકે, મામલો વધુ બીચકે તે પહેલાં જ પોલીસનો કાફલો ઘટના સ્થળ પર દોડી ગયો હતો અને સ્થિતિને કાબુમાં લીધી હતી.
રામ નવમી નિમીત્તે શોભાયાત્રાનું આયોજન કરાયું હતું
વડોદરામાં આજે શહેરના રામજી મંદિરો સહિત નાના-મોટા રામજી મંદિરોમાં વિવિધ કાર્યક્રમો સાથે રામનવમીની ઉજવણી કરવામાં આવી રહી હતી.બીજી બાજુ વિશ્વ હિંદુ પરિષદ અને બજરંગ દળ દ્વારા રામ નવમી નિમીત્તે શોભાયાત્રાનું આયોજન કરવામાં આવ્યું હતું. એક તરફ મુસ્લીમ સમાજના રમઝાન માસની ઉજવણી અને બીજી તરફ રામનવમી નિમીત્તે વિહીપ અને બજરંગ દળ દ્વારા શોભાયાત્રાનું આયોજન કરવામાં આવતા પોલીસ તંત્ર દ્વારા બંને સમાજના અગ્રણીઓ સાથે શાંતિસમિતીની બેઠકનું પણ આયોજન કરવામાં આવ્યું હતું.
પોલીસે તાત્કાલિક મામલો થાળે પાડ્યો હતો
ગઈકાલે રાત્રે પોલીસ તંત્ર દ્વારા ફૂટ પેટ્રોલીંગ પણ કરવામાં આવ્યું હતું.પોલીસ તંત્ર દ્વારા ચુસ્ત પોલીસ બંદોબસ્ત વચ્ચે વિશ્વ હિંદુ પરિષદ અને બજરંગ દળ દ્વારા આયોજીત શોભાયાત્રા વાજતે-ગાજતે ફતેપુરા રોડ ઉપરથી પસાર થઇ રહી હતી.તે દરમિયાન પાંજરીગર મહોલ્લા પાસે શોભાયાત્રા ઉપર પથ્થરમારો થતા નાસભાગ મચી ગઇ હતી.પથ્થરમારો થતાં જ ઉશ્કેરાયેલા ટોળા દ્વારા ફેતપુરાથી કારેલીબાગ પોલીસ મથક સુધીના રોડ પર સંખ્યાબંધ લારીઓની તોડફોડ કરી હતી.જો કે પોલીસ કાફલો તાત્કાલિક ઘટના સ્થળે પહોંચી જતાં મામલો થાળે પડ્યો હોવાનું જાણવા મળ્યું છે.
