વેગનર ગ્રૂપના વડા યેવજેની પ્રિગોઝિનનું વિમાન દુર્ઘટનામાં મૃત્યુ થયું છે.વેગનર સાથે જોડાયેલી ટેલિગ્રામ ચેનલે પણ પ્રિગોઝિનના મૃત્યુની પુષ્ટિ કરી છે.તેમાં કહેવામાં આવ્યું છે કે વેગનર ચીફ અને રશિયાના હીરો યેવજેની પ્રિગોઝિન માર્યા ગયા છે. રશિયાની એવિએશન ઓથોરિટી રોસાવિયેત્સિયાએ પણ કહ્યું છે કે, બુધવારે સાંજે ક્રેશ થયેલા પ્લેનમાં મુસાફરી કરી રહેલા 10 લોકોમાં પ્રિગોઝિન અને વરિષ્ઠ વેગનર કમાન્ડર દિમિત્રી ઉત્કિનનો સમાવેશ થાય છે.વિમાન દુર્ઘટનામાં 10 લોકોના મોત થયા હોવાનું કહેવાય છે.
વિમાન ક્રેશની રશિયન મિનિસ્ટ્રીએ કરી પુષ્ટિ
રશિયન ઈમરજન્સી મિનિસ્ટ્રીએ કહ્યું છે કે, ટાવર વિસ્તારમાં એક પ્રાઈવેટ જેટ ક્રેશ થયું છે.ત્રણ ક્રૂ મેમ્બર અને તેમાં સવાર સાત મુસાફરોના મોત થયા હતા.મંત્રાલયનું કહેવું છે કે, વિમાન રાજધાની મોસ્કોથી સેન્ટ પીટર્સબર્ગ જઈ રહ્યું હતું.પ્રિગોઝિને જૂનમાં જ રશિયા સામે બળવો કર્યો હતો.આવી સ્થિતિમાં એવી ચર્ચાઓ પણ થઈ રહી છે કે રાષ્ટ્રપતિ વ્લાદિમીર પુતિને આ માટે પ્રિગોઝિનને સજા આપી છે.
એક અહેવાલ અનુસાર, પુતિન પાસે પોતાના દુશ્મનોને રસ્તામાંથી હટાવવાનો રેકોર્ડ છે.રશિયન રાષ્ટ્રપતિ સામે ઊભા રહેવાનો અર્થ મૃત્યુને આમંત્રણ આપવાનો છે.વેગનરના બળવાથી,તે નિશ્ચિત હતું કે પ્રિગોઝિનની હત્યા કરવામાં આવશે.આ જ કારણ છે કે બુધવારે થયેલા અકસ્માતમાં લોકો પુતિનનો હાથ પણ સ્વીકારી રહ્યા છે.આવી સ્થિતિમાં, ચાલો જાણીએ તે લોકો વિશે, જેમને પુતિને ઠેકાણા પાડી દીધા હતા.
પ્રિગોઝિનની જેમ આ લોકોના પણ થયા મૃત્યુ
રવિલ મગાનોવ : ઓઈલ કંપની લ્યુકોઈલના ચેરમેન રવિલ મગાનોવે યુક્રેન પરના હુમલાની ખુલ્લેઆમ ટીકા કરી હતી.તેણે તરત જ યુદ્ધ સમાપ્ત કરવાનું કહ્યું.યુદ્ધ ફેબ્રુઆરી 2022 માં શરૂ થયું, અને સપ્ટેમ્બરમાં મેગાનોવ મોસ્કોમાં હોસ્પિટલની બારીમાંથી પડીને મૃત્યુ પામ્યો.જો કે, લ્યુકોઈલે કહ્યું કે મેગાનોવનું મૃત્યુ ગંભીર બીમારીને કારણે થયું હતું.પરંતુ તેની પાછળ પુતિનનો હાથ હોવાનું જણાવવામાં આવ્યું હતું.
મિખાઇલ લેસિન : રશિયન પ્રેસ મિનિસ્ટર મિખાઇલ લેસિનનું નવેમ્બર 2015માં વોશિંગ્ટન ડીસીમાં રહસ્યમય રીતે મૃત્યુ થયું હતું.તેના ચહેરા પર ઈજાના નિશાન હતા.તે લેસિન હતા જેમણે અંગ્રેજી ભાષાના ટેલિવિઝન નેટવર્ક રશિયા ટુડે (RT) ની સ્થાપના કરી હતી.તેમના મૃત્યુ પહેલા, લેસિન એફબીઆઈના સંપર્કમાં હતા.તે રશિયાના આંતરિક કાર્યો વિશે ઘણું જાણતો હતો.કહેવાય છે કે આ કારણોસર તેને ઠેકાણે પાડી દેવાયો હતો.
બોરિસ નેમ્ત્સોવ : બોરિસ યેલ્ત્સિનના સમયે બોરિસ નેમ્ત્સોવ રશિયાના નાયબ વડાપ્રધાન હતા. તેઓ પુતિનના મોટા ટીકાકાર ગણાતા હતા.નેમ્ત્સોવે પુતિન પર રશિયાના ધનિક વર્ગના ઈશારે નાચવાનો અને તેમની પાસેથી પૈસા લેવાનો આરોપ લગાવ્યો હતો. 2015 માં જ્યારે તે મોસ્કોમાં એક રેસ્ટોરન્ટમાંથી બહાર નીકળી રહ્યો હતો ત્યારે તેની ગોળી મારીને હત્યા કરવામાં આવી હતી.હત્યાનું સ્થળ ક્રેમલિનથી થોડે દૂર હતું.
બોરિસ બેરેઝોવ્સ્કી : રશિયન ઓલિગાર્ક બોરિસ બેરેઝોવ્સ્કીનો પુતિન સાથે અણબનાવ થયો હતો અને પોતાનો જીવ બચાવીને બ્રિટન ભાગી ગયો હતો.તેણે પુતિનને બ્રિટનમાંથી જ ધમકી આપી હતી. પછી માર્ચ 2013 માં સમાચાર આવ્યા કે બેરેઝોવ્સ્કીએ આત્મહત્યા કરી લીધી છે.જ્યારે તેની લાશને બાથરૂમની અંદરથી બહાર કાઢવામાં આવી ત્યારે તેના ગળા પર પાટો બાંધવામાં આવ્યો હતો.પોલીસ પણ પુષ્ટિ કરી શકી નથી કે આ હત્યા છે કે આત્મહત્યા ?
નતાલિયા એસ્ટેમિરોવા : નતાલિયા એસ્ટેમિરોવા ચેચન્યામાં રશિયા દ્વારા કરવામાં આવતા માનવ અધિકારોના હનનનો પર્દાફાશ કરતી હતી.તેમના રિપોર્ટના કારણે રશિયન સરકાર પર વારંવાર દબાણ કરવામાં આવતું હતું.ત્યારબાદ 2009માં તેનું અપહરણ કરવામાં આવ્યું હતું.થોડા દિવસો પછી જંગલમાંથી તેની લાશ મળી આવી.એસ્ટેમિરોવાના માથામાં ગોળીનો ઘા હતો.તેના હત્યારા વિશે આજદિન સુધી કંઈ જાણવા મળ્યું નથી.
એલેક્ઝાન્ડર લિટવિનેન્કો : ભૂતપૂર્વ કેજીબી એજન્ટ એલેક્ઝાન્ડર લિટવિનેન્કો પુતિનના સૌથી મોટા ટીકાકારોમાંના એક હતા.તેણે પુતિન પર પત્રકારની હત્યા કરવાનો આરોપ લગાવ્યો હતો. 2006માં લંડનની એક હોટલમાં ઝેરી ચા પીધા બાદ તેમનું મૃત્યુ થયું હતું.પોલીસે જણાવ્યું હતું કે લિટવિનેન્કોને એફએસબી એજન્ટો આન્દ્રે લુગોવોઈ અને દિમિત્રી કોવતુન દ્વારા ઝેર આપવામાં આવ્યું હતું.પુતિને આ મિશન પાર પાડવા માટે બંને એજન્ટોને મોકલ્યા હતા.
એના પોલિટકોવસ્કાયા : રશિયન પત્રકાર એના પોલિટકોવસ્કાયાએ તેમના પુસ્તક Putin’s Russia માં, રશિયન રાષ્ટ્રપતિ પર દેશને પોલીસ સ્ટેટમાં ફેરવવાનો આરોપ મૂક્યો છે.આ વાતથી રશિયન સરકાર નારાજ થઈ ગઈ હતી અને ત્યારબાદ 2006માં સુપારી કીલર્સે તેમની હત્યા કરી દીધી હતી.આ હત્યા માટે પાંચ લોકોને દોષિત પણ ઠેરવવામાં આવ્યા હતા.પરંતુ કહેવાય છે કે આ લોકોને હત્યા માટે એક કરોડ રૂપિયા મળ્યા હતા.
પોલ ક્લેબનિકોવ : ફોર્બ્સની રશિયન આવૃત્તિના મુખ્ય સંપાદક પોલ ક્લેબનિકોવે રશિયાના ભ્રષ્ટાચાર વિશે ઘણું લખ્યું છે.તે રશિયાના ધનિક લોકોના રહસ્યો પણ જાહેર કરી રહ્યો હતો.કહેવાય છે કે પુતિન આનાથી ખૂબ ગુસ્સે થયા હતા. 2004માં સુપારી કીલર્સે તેની હત્યા કરી હતી.જ્યારે તેની હત્યા કરવામાં આવી ત્યારે તે તેની કારમાં જ હતા.
