અમદાવાદ : ગુરૃવાર : ગુજરાત રાજ્યના ગુડ્સ એન્ડ સર્વિસ ટેક્સ વિભાગની મોબાઈલ સ્ક્વૉડના અધિકારીઓએ ૧૦૦૦થી વધુ ટ્રકને રસ્તા પર રોકીને એપ્રિલ અને મે ૨૦૨૨માં રૃા.૩૯ કરોડથી વધુ રકમની રિકવરી કરી છે.ગેરકાયદે માલની હેરફેરમાં જીરુ,તાંબાના ભંગાર,લોખંડના ભંગાર અને મરી,સોપારી જેવી કોમોડિટીની ગેરકાયદે હેરફેર વધુ પ્રમાણમાં થતી હોવાનું જોવા મળે છે.
આ યાદીમાં વિટ્રીફાઈડ ટાઈલ્સ અને તેને લગતી અન્ય સામગ્રીઓની પણ વધુ હેરફેર થતી હોવાનું જોવા મળે છે.મે ૨૦૨૨માં ગુજરાતના જુદાં જુદાં વિસ્તારોમાં મળીને અંદાજે ૭૨૨ ટ્રકને રોકવામાં આવી હતી.આ જ રીતે એપ્રિલ માસમાં પણ ૩૫૦થી વધુ ગાડી રોકવામાં આવી હતી.ગુજરાતમાં ખાસ કરીને અમદાવાદ,ભાલાડ,શામળાજી,સોનગઢ,અમિરગઢ,સુરત,ભાવનગર વિસ્તારોમાંથી મોબાઈલ સ્ક્વોડે પૂરતા દસ્તાવેજો વિના લઈ જવાની ટ્રક પકડી પાડી હતી.
કેટલાક કિસ્સામાં જીએસટી નંબર લીધા બાદ પહેલીવાર રિટર્ન ફાઈલ કરવાની તારીખ આવે તે પૂર્વ ેજ ૨૫-૫૦ વહેવારો કરી દઈને તેના પર ઇનપુટ ટેક્સ ક્રેડિટ લઈને પલાયન થઈ જનારાઓ પણ માલની હેરફેર કરતાં હોવાનું જોવા મળ્યું હતું.આ જ રીતે એક કરતાં વધુ કંપનીઓ કે કોમોડિટી લઈ જનારાઓ તેમના કુલ પરચૂરણ સામાનમાં ૨૦થી ૨૫ ટકા સામગ્રી ઇ-વે બિલ વિના જ લઈ જતાં હોવાનું પણ સ્ટેટ જીેએસટીના ધ્યાનમાં આવ્યું છે.તેમ જ તમાકુ,જીરુ જેવી કોમોડિટી લઈ જતી ટ્રકમાં ૨૦ ટન માલ ભર્યો હોય તો પણ ઈ-વૅ બિલમાં માત્ર ૧૫ ટન જ માલ બતાવવામાં આવ્યો હોય તેવા કિસ્સાઓ પણ બહાર આવ્યા છે.
