– અમદાવાદ, ગાંધીનગર, મહેસાણાના ટોપર્સ તેમજ ફેકલ્ટીને લાલચ આપીને કામે રાખ્યા
– અમિત ચૌધરીએ નવસારીમાં લેવાયેલી પરીક્ષામાં પરીક્ષા લેનારા લોકોને પણ ફોડ્યા હતા
અમદાવાદ : મહેસાઆના IETLS કૌભાંડના માસ્ટરમાઈન્ડ અમિત ચૌધરીની કરતૂતો ધીરે-ધીરે બહાર આવી રહી છે.આ કેસની તપાસ કરી રહેલી મહેસાણા પોલીસના સૂત્રોના જણાવ્યા અનુસાર, ઈંગ્લિશમાં સાવ ડફોળ હોય તેવા લોકોને પણ સાડા સાતથી આઠ બેન્ડ અપાવવાની ગેરન્ટી આપતા ગાંધીનગરના અમિત ચૌધરીએ તેના માટે અમદાવાદ,ગાંધીનગર તેમજ મહેસાણાના IELTS કોચિંગ સેન્ટરના ટોપર્સને કામે રાખ્યા હતા.આ ટોપર્સને અસલી ઉમેદવારોના પ્રોક્સી તરીકે પરીક્ષામાં ગોઠવવામાં આવતા હતા.
અસલી ઉમેદવાર કેમેરા સામે માત્ર હોઠ ફફડાવતા
મહેસાણા પોલીસના સૂત્રોનું માનીએ તો ચૌધરી ડમી ઉમેદવારોને લેખિત તેમજ વાઈવામાં બેસવા માટે એક ઉમેદવાર દીઠ દસ હજાર રુપિયા આપતો હતો.બીજી તરફ, તે પોતાના ક્લાયન્ટ પાસે IELTSમાં ઉંચો સ્કોર લાવવા માટે 14 લાખ રુપિયા જેટલી તગડી રકમ પડાવતો હતો.ચૌધરી એવી ગોઠવણ કરતો કે એક્ઝામના સેન્ટર પર લેખિત પરીક્ષામાં તેના ડમી ઉમેદવારો ગોઠવાઈ જતા હતા,જ્યારે સ્પિકિંગ ટેસ્ટમાં કેમેરા સામે રહેલો અસલી ઉમેદવાર માત્ર હોઠ ફફડાવતો જ્યારે સવાલના જવાબ ડમી ઉમેદવાર આપતો હતો.ચાલાક ચૌધરીએ પરીક્ષા લેનારા લોકોને પણ ફોડી લીધા હતા.
પોતે IELTSના ક્લાસ કરતો ત્યારે ડમી ઉમેદવારોને શોધ્યા
અમિત ચૌધરી ગાંધીનગરના સરગાસણનો રહેવાસી છે.તેણે પોતે પણ મહેસાણામાં IELTSનું કોચિંગ લઈને પરીક્ષા આપી હતી, જેમાં તેના છ બેન્ડ આવ્યા હતા.મહેસાણા અને અન્ય શહેરોના કોચિંગ ઈન્સ્ટિટ્યૂટના વિદ્યાર્થીઓ અને ટીચર્સને મળ્યા બાદ તેણે ડમી ઉમેદવાર તરીકે પરીક્ષા આપી શકે તેવા લોકોની શોધખોળ ચાલુ કરી હતી.
હોટેલમાં રુમ બુક કરાવી ડમી ઉમેદવારોને જલસા કરાવતો
અમિત ચૌધરીએ કુલ 10 લોકોને પોતાના ક્લાયન્ટ વતી IELTSની પરીક્ષા આપવા માટે તૈયાર કર્યા હતા.જેમને તે એક્ઝામ સેન્ટર પર લઈ જતો,એક ઉમેદવાર માટે પરીક્ષા આપવાના દસ હજાર રુપિયા આપતો તેમજ હોટેલમાં રુમ બુક કરાવીને તેમને જલસા કરાવતો હતો.ચૌધરી આ તમામ લોકોને એવી લાલચ આપતો હતો કે આ રીતે શોર્ટકટમાં તેઓ રુપિયા કમાઈને વિદેશ પણ જઈ શકે છે.
TOIએ ફોડ્યો હતો આ કૌભાંડનો ભાંડો
IELTSમાં ઉંચા બેન્ડ અપાવવાની ગોઠવણના કૌભાંડનો ભાંડો અમારા સાથી અખબાર ટાઈમ્સ ઓફ ઈન્ડિયા દ્વારા ફોડવામાં આવ્યો હતો.એપ્રિલ મહિનામાં કેનેડાની બોર્ડર ક્રોસ કરીને અમેરિકામાં ઘૂસતા ઝડપાયેલા ઉત્તર ગુજરાતના છ યુવાનોની પૂછપરછમાં તેનો ખુલાસો થયો હોત.આ છ યુવકો બોટમાં બેસીને અમેરિકામાં ઘૂસ્યા હતા, પરંતુ તેમની બોટ ડૂબવા લાગી હતી અને તેમને અમેરિકાની પોલીસે બચાવી લીધા હતા.
છ લોકો અમેરિકામાં ઝડપાયા અને મામલો બહાર આવ્યો
આ તમામ છ યુવકોને અમેરિકાની કોર્ટમાં તેમની શૈક્ષણિક લાયકાત વિશે સવાલ પૂછાયા ત્યારે તેઓ ઈંગ્લિશમાં એક વાક્ય પણ સરખી રીતે બોલી નહોતા શક્યા.જોકે, તમામને IELTSમાં સાડા સાત જેટલા બેન્ડ આવ્યા હોવાથી ઈંગ્લિશમાં ‘ઢ’ એવા આ યુવકો આટલા બેન્ડ કઈ રીતે લાવ્યા તે સવાલ ઉઠ્યો હતો.જેની વિગતે તપાસ કરતા મહેસાણામાં ચાલતા IELTS કૌભાંડનો ભાંડો ફુટ્યો હતો.
45 લોકો સામે ફરિયાદ
મહેસાણા પોલીસે રવિવારે આ મામલે અમિત ચૌધરી તેમજ અમેરિકામાં ઘૂસતા ઝડપાયેલા છ યુવકો સહિત કુલ 45 લોકો સામે ચીટિંગ,બનાવટ,ગુનાઈત કાવતરા સહિતના ગુના હેઠળ ફરિયાદ દાખલ કરી છે,જેમાંથી ત્રણ લોકોની હાલ ધરપકડ કરી લેવાઈ છે. ઉલ્લેખનીય છે કે, IELTSમાં ઉંચા બેન્ડ લાવનારા આ લોકો સ્ટૂડન્ટ વિઝા પર અમેરિકા જતા હતા અને ત્યાંથી બોર્ડર ક્રોસ કરીને અમેરિકામાં ઘૂસી જતા હતા.
