IND V/S NZ ટેસ્ટ : વરસાદના વિઘ્નને પગલે ત્રીજું સેશન ધોવાયું

એજન્સી, વેલિંગ્ટન

ભારત અન ન્યૂઝીલેન્ડ સામેની પ્રથમ ટેસ્ટ મેચના પ્રથમ દિવસની રમત ત્રીજા સેશનમાં વરસાદને કારણે પૂર્ણ કરવામાં આવી છે. અજિંક્ય રહાણે અને મયંક અગ્રવાલને બાદ કરતા ભારતીય બેટ્સમનો ખાસ પ્રદર્શન કરી શક્યા નથી. ગ્રીન ટોપ પીચ ઉપર પ્રથમ દિવસની રમતના અંતે ભારતનો સ્કોર પાંચ વિકેટે 122 રન રહ્યો છે. ટીમ બ્રેક બાદ કડાકા ભડાકા સાથે વરસાદ તૂટી પડ્યો હોવાથી પ્રથમ દિવસનું ત્રીજું સેશન ધોવાણી ગયું છે.

બેઝિન રિઝર્વ ખાતે રમાઈ રહેલી પ્રથમ ટેસ્ટ મેચમાં ન્યૂઝીલેન્ડના કેપ્ટન કેન વિલિયમસને ટોસ જીતીને પ્રથમ ફિલ્ડિંગનો નિર્ણય કર્યો હતો. પ્રથમ દિવસની રમતના અંત સુધીમાં 55 ઓવર રમાઈ હતી. વરસાદ વિઘ્નરૂપી બન્યો હતો અને અમ્પાયર્સે ગ્રાઉન્ડની સમીક્ષા કર્યા બાદ સ્ટમ્પ્સની જાહેરાત કરી હતી. અજિંક્ય રહાણે 38 અને રિષભ પંત 10 રન સાથે બેટિંગમાં છે. પૃથ્વી શો અને મયંક અગ્રવાલની જોડીએ ટેસ્ટમાં ઓપનિંગ કર્યું હતું. જો કે પૃથ્વી શો 18 બોલમાં 16 રન કરીને સાઉધીનો શિકાર બન્યો હતો. વન ડાઉન બેટિંગમાં ઉતરેલો ચેતેશ્વર પૂજારા પણ ખાસ પ્રદર્શન કરી શક્યો નહતો અને 11 રન પર બોલ્ટની ઓવરમાં જેમિસનના હાથે કેચ આઉટ થયો હતો. ટીમ ઈન્ડિયાના કેપ્ટન વિરાટ કોહલી ફક્ત બે રન કરી શક્યો હતો જ્યારે મયંક અગ્રવાલ 34 રન પર આઉટ થયો હતો. હનુમા વિહારી પણ સાત રન કરીને પેવેલિયન પરત ફર્યો હતો. ન્યૂઝીલેન્ડ તરફથી જેમિસને ત્રણ વિકેટ ઝડપી હતી જ્યારે સાઉધી અને બોલ્ટે એક-એક વિકેટ ઝડપી હતી.