નવી દિલ્હી, તા. 05 માર્ચ, 2022, શનિવાર : ઓસ્ટ્રેલિયાના દિગ્ગજ સ્પિનર શેન વોર્નનું 52 વર્ષની વયે અવસાન થયું છે.જણાવવામાં આવી રહ્યું છે કે,હાર્ટ એટેકના કારણે શુક્રવારે થાઈલેન્ડમાં તેમનું અવસાન થયું છે.શેન વોર્ન ટેસ્ટ ક્રિકેટમાં બીજા નંબરના સૌથી વધુ 708 વિકેટ લેનારા બોલર હતા.
ઈન્ડિયન પ્રીમિયર લીગ (IPL)માં પણ શેન વોર્નનું યોગદાન ઘણું મહત્વપૂર્ણ રહ્યું છે.જ્યારે આઈપીએલની શરૂઆત થઈ રહી હતી ત્યારે બહુ ઓછા લોકોને આશા હતી કે આ ટુર્નામેન્ટ આજે વિશ્વની સૌથી મોટી ક્રિકેટ લીગ બની જશે.શું તમે જાણો છો, IPL ઓક્શનમાં વેચાયેલો પહેલો ખેલાડી કોણ હતો અને પ્રથમ ખિતાબ જીતનાર કેપ્ટન કોણ હતો?
વોર્નની કેપ્ટન્સીમાં રાજસ્થાને પ્રથમ આઈપીએલ ખિતાબ જીત્યો હતો
હા,તે બંને શેન વોર્ન જ હતા.હરાજીમાં વેચાયેલ તે પ્રથમ ખેલાડી હતો જેને રાજસ્થાન રોયલ્સ ટીમે 4.50 લાખ ડોલર (લગભગ 2 કરોડ રૂપિયા)માં ખરીદ્યો હતો.ત્યારબાદ તેમને ટીમનો કેપ્ટેન બનાવવામાં આવ્યો હતો.તે સિઝનમાં રાજસ્થાનની ટીમ ઘણી નબળી હતી અને યુવા ખેલાડીઓથી સજ્જ હતી.તેને અંડરડોગ ટીમ તરીકે ગણવામાં આવી રહી હતી.જોકે,અનુભવના નામે તેને વોર્ન જેવા મોટા ખેલાડીનો સાથ મળ્યો હતો અને તે ટીમ માટે પૂરતો હતો.
ટીમની શરૂઆત પણ ખરાબ થઈ હતી. પહેલી જ મેચમાં તેને દિલ્હીની ટીમે 9 વિકેટે પરાજય આપ્યો હતો.આ હાર બાદ વોર્નની કેપ્ટન્સીમાં રાજસ્થાનની ટીમે પાછું વળીને ન જોયું અને ખિતાબ જીતીને જ હાશકારો લીધો હતો.રાજસ્થાન ટીમે 2008ની સિઝનના ફાઈનલમાં મહેન્દ્ર સિંહ ધોનીની કેપ્ટન્સી વાળી ચેન્નાઈ સુપર કિંગ્સને 3 વિકેટથી હરાવ્યું હતું.
રાજસ્થાન રોયલ્સે લખી ઈમોશનલ પોસ્ટ
શેન વોર્ન,આ નામ જાદુ માટે જાણીતું છે.અમારો પ્રથમ રોયલ,જે માણસે અમને એ ભરોસો અપાવ્યો કે,અસંભવ એ માત્ર એક મિથ છે.એક લીડર જે પગપાળા ચાલ્યો,વાત કરી,અંડરડોગ ટીમને ચેમ્પિયન બનાવી હતી.એક મેન્ટર જેના સ્પર્શથી બધુ જ સોનામાં પરિવર્તિત થઈ જતું હતું.
આ સમયે અમે શું અનુભવી રહ્યા છે તેને વ્યક્ત કરવા માટે અમારી પાસે શબ્દો જ નથી.અમે માત્ર એટલું જાણીએ છીએ કે,આજે આખું વિશ્વ ગરીબ થઈ ગયું છે.તમારી સ્મિત, પ્રતિભા અને જીવનશૈલી વિના બધું અધૂરું છે.વિશ્વભરના ક્રિકેટ ચાહકોની જેમ અમે પણ સંપૂર્ણપણે નિરાશ છીએ.
