નવી દિલ્હી : ઇન્ડિયન પ્રીમિયર લીગ(આઇપીએલ) અત્યારે વિશ્વની સૌથી ધનાઢ્ય ક્રિકેટ લીગ છે પરંતુ તેનો પ્રારંભ થયો ત્યારે પણ તેણે એવું આકર્ષણ પેદા કર્યું હતું કે તેનાથી અંજાઈ જવાય.આઇપીએલના સૌપ્રથમ કમિશનર લલિત મોદી હાલમાં તો ભાગેડૂ જાહેર થયા છે પરંતુ તેઓ આઇપીએલના કમિશનર હતા ત્યારે પોતે જ તવંગર છે તેવો અહેસાસ કરાવવામાં તેમણે કોઈ કસર છોડી ન હતી.આઇપીએલની મેચો ધરમશાલા (હિમાચલ પ્રદેશ)અને નાગપુરમાં રમાતી હોય ત્યારે આયોજકોએ તેમના માટે અત્યંત મોંઘી એવી એસ-ક્લાસ મર્સિડીઝ કારની ખાસ વ્યવસ્થા કરવી પડતી હતી.આ માટે તેઓ વિમાન માર્ગે ધરમશાલા પહોંચે તે અગાઉ દિલ્હીથી એક ખાસ મર્સિડીઝ કાર ધરમશાલા મોકલી દેવામાં આવતી હતી.
લલિત મોદી અંગેના આ પ્રકારના કિસ્સા અંગે તાજેતરમાં પ્રકાશિત પુસ્તક‘મેવેરિક કમિશનરઃ ધ આઇપીએલ–લલિત મોદી સાગા’પુસ્તકમાં આ ઘટસ્ફોટ કરાયો છે.લલિત મોદીનો એવો આગ્રહ રહેતો હતો કે તેઓ મર્સિડીઝ કાર વિના અન્ય કોઈ મોડલની કારમાં મુસાફરી કરશે નહીં.જોકે 2010ના મે મહિનામાં તેમણે દેશ છોડીને ભાગી જવું પડ્યું ત્યાર બાદ એક હોટેલે લલિત મોદીના નામના બિલ મોકલ્યા હતા જે બીસીસીઆઈએ ચુકવવાનો ઇનકાર કરી દીધો હતો.તેઓ બોર્ડમાં હતા ત્યારે આ પ્રકારના ઘણા ખર્ચ કર્યા હતા પરંતુ ભાગેડૂ જાહેર થયા બાદ બોર્ડે તેમના બિલ ચૂકવ્યા ન હતા.
આઇપીએલમાં ગ્લેમર અને સ્વચ્છંદીપણું પણ લલિત મોદી જ લાવ્યા હતા તેવા આક્ષેપ સાથે આ પુસ્તકમાં એવો પણ અહંકારને કારણે લલિત મોદી તેમણે જ લાવેલી સફળતાનો ભોગ બન્યા હતા. આઇપીએલની પ્રારંભિક સફળતાને કારણે મદમાં આવી ગયેલા લલિત મોદી ઉચ્ચ કક્ષાની જીવનશૈલીમાં રહેતા હતા.એક વાર લલિત મોદી બીસીસીઆઈના પ્રમુખ શશાંક મનોહરને મળવા નાગપુર ગયા ત્યારે તેમણે એસ-ક્લાસ મર્સિડીઝનો આગ્રહ રાખ્યો હતો.
નાગપુરમાં આ મોડલની કાર ઉપલબ્ધ ન હોવાથી તેમના માટે તાત્કાલિક હૈદરાબાદથી એક ખાસ કાર દોડાવવામાં આવી હતી જે લલિત મોદી નાગપુર પહોંચે તે અગાઉ તેમના સત્કારમાં હાજર હતી.આ ઉપરાંત તેઓ ફાઇવ સ્ટાર હોટેલનો એક આખો માળ જ પોતાના માટે બુક કરાવતા હતા અને તેમના માળ પર અન્ય કોઈને રૂમ ફાળવાતો ન હતો.જોકે એ વખતે તેમનો વિરોધ કરવાની કે તેમને સવાલ કરવાની કોઈ હિંમત કરતું ન હતું.
