રાજ્યમાં સરકાર ભ્રષ્ટાચાર નહીં હોવાની વાતો કરે છે પરંતુ અવાર નવાર ભ્રષ્ટાચાર કરતાં સરકારી અધિકારીઓ એન્ટી કરપ્શન બ્યુરોના અધિકારીઓના હાથે ઝડપાઈ છે. સરકારી બાબુ લોકોના નાના-નાના કામ કરવા માટે પણ પૈસાની માંગણી કરતા હોવાનું સામે આવે છે.ત્યારે ગાંધીનગરમાં વર્ગ-3નો સરકારી કર્મચારી કરોડો રૂપિયાનો આસામી હોવાનું સામે આવ્યું છે.જિલ્લામાં ફરજ બજાવતો વર્ગ-3નો કર્મચારી 2000 કરોડનો આસામી હોવાનો આક્ષેપ કોંગ્રેસના પાટણના ધારાસભ્ય કિરીટ પટેલે ગાંધીનગર જિલ્લા કલેક્ટરને લખેલા પત્રમાં કર્યો છે.ધારાસભ્ય કિરીટ પટેલ આ સરકારી કર્મચારીને એક IPS અધિકારી રક્ષણ આપતા હોવાના પણ આક્ષેપ કરવામાં આવ્યા છે. પત્રમાં વર્ગ-3ના કર્મચારીએ IPS ઓફિસરની મદદથી 100 કરોડની જમીન ખાનગી ડૉક્ટર પાસેથી પચાવી હોવાનો પણ આક્ષેપ થયો છે.
આ બાબતે પાટણના ધારાસભ્ય કિરીટ પટેલે જણાવ્યું હતું કે,ગાંધીનગર કલેક્ટર ઓફિસની અંદર નાયબ મામલતદાર તરીકે કામ કરતો વર્ગ-3નો કર્મચારી આજે ઓન પેપર 2 હજાર કરોડ કરતા પણ વધારેની સંપત્તિ ધરાવે છે. રાજ્ય સરકારે ભૂમાફિયા માટે કડક કાયદાઓ બનાવીને રાજ્યની અંદર ભૂમાફિયાઓ પર કાર્યવાહી કરવાનું જણાવ્યું છે.વિધાનસભામાં પણ ગૃહ મંત્રી અને અન્ય મંત્રી રાડો પાડી પાડીને આવા ભૂમાફિયાઓ સામે કાર્યવાહી કરવાનું જણાવ્યું છે. પરંતુ ગાંધીનગરની અંદર જ એક કર્મચારીઓ છે કે, જે માત્ર એક IPS અધિકારીના ઇશારે જમીનો જપ્ત કરવાની કાર્યવાહી કરે છે.આ અધિકારી જમીનો હડપ કરીને ખોટા દસ્તાવેજો ઊભા કરીને 2 હજાર કરોડ રૂપિયાથી પણ વધુ સંપત્તિ ઓન પેપર તેને ભેગી કરી છે.આજે મે કલેક્ટરને મળીને લેખિતમાં રજૂઆત કરીને બધી માહિતી માંગી છે. જ્યારે મને આ બાબતે તમામ વિગતો મળશે ત્યારે હું તમામ માહિતી મીડિયા સમક્ષ રજૂ કરીશ.
કિરીટ પટેલે પત્રમાં એવા પણ આક્ષેપો કર્યા છે કે,ગાંધીનગર કલેક્ટર કચેરીમાં વર્ગ-3નો કર્મચારી ફરજ બજાવી રહ્યા છે તેણે ધોરણ 10ની નકલી માર્કશીટના આધારે નોકરી મેળવી છે. વિધાનસભા સત્રમાં પણ કોંગ્રેસના ધારાસભ્ય બળદેવજી ઠાકોર દ્વારા પણ આ બાબતે રજૂઆત કરવામાં આવી હતી કે,ગાંધીનગરમાં એક વર્ગ-3નો કર્મચારી અને તેની સાથે એક IPS અધિકારી બંને સાથે મળીને તેમના મત વિસ્તારની અંદર લોકોની જમીન પચાવી પાડવા માટેના કામ કરી રહ્યા છે.ધારાસભ્ય કિરીટ પટેલે કલેકટર પાસેથી માહિતી માંગી છે કે,વર્ગ-3ના સરકારી કર્મચારી પાસેથી બે હજાર કરોડની સંપતિ ક્યાંથી આવી.આ સમગ્ર ઘટના પરથી સવાલ એ થાય છે કે,કોંગ્રેસના બે ધારાસભ્યો સરકારી અધિકારી સામે બે હજાર કરોડ કરતા પણ વધારે સંપત્તિ હોવાનો આક્ષેપ કરી રહ્યા છે ત્યારે આ સમગ્ર મામલે ACB દ્વારા કેમ કોઈ તપાસ કરવામાં આવતી નથી.
