અમેરિકા, તા. 4 મે 2020, સોમવાર
છેલ્લા કેટલાક સપ્તાહથી સમગ્ર વિશ્વમાં ઉત્તર કોરિયાની ચર્ચા ચાલી રહી છે. ત્યારે અમેરિકી મિલિટ્રી કોઈ આકસ્મિક ઘટનાને ધ્યાનમાં રાખીને પોતાના ઓપરેશન પ્લાન (OPLAN) 5029ને રિવ્યુ કરી રહી છે.આ પ્લાન ઉત્તર કોરિયાના પરમાણુ હથિયારો સાથે સંકળાયેલો છે.અમેરિકાનો ઓપરેશન પ્લાન 5029 જ્યારે અચાનક કોઈ કારણથી ઉત્તર કોરિયાની સત્તા અસ્થિર થઈ જાય તેવી સ્થિતિ માટે છે.
જો ઉત્તર કોરિયામાં અચાનક જ અસ્થિરતા સર્જાય તો યુનાઈટેડ સ્ટેટ્સ ફોર્સેઝ કોરિયા (USFK)ના કમાંડરની જવાબદારી બને છે કે, તે ઉત્તર કોરિયાના ન્યૂક્લિયર હથિયારોનો ઉપયોગ ન થાય તે સુનિશ્ચિત કરે. ઉપરાંત આંતરરાષ્ટ્રીય બ્લેક માર્કેટમાં ઉત્તર કોરિયાના ન્યૂક્લિયર હથિયારોને વેચી દેવામાં ન આવે તે પણ ધ્યાનમાં રાખવું પડે.સૌ પ્રથમ 1999માં અમેરિકી મિલિટ્રીએ OPLAN 5029ની ઉપસ્થિતિનો સાર્વજનિક સ્વીકાર કર્યો હતો.
OPLAN 5029નો મુખ્ય ઉદ્દેશ્ય જ્યારે ઉત્તર કોરિયાની સરકાર કામ કરી શકે તેમ ન હોય અથવા તો ન્યૂક્લિયર હથિયારોનો કન્ટ્રોલ અનિશ્ચિત હોય ત્યારે ઉત્તર કોરિયાના ન્યૂક્લિયર હથિયાર અને સરહદને સિક્યોર કરવાનો છે.આ ઉપરાંત ઉત્તર કોરિયાના ન્યૂક્લિયર હથિયારોનો અન્ય કોઈ ઉપયોગ કરી લે કે પછી તે ચોરાઈ જાય તેનો પણ અમેરિકાને ડર રહે છે.કયા ઈન્ડિકેટરના આધારે OPLAN 5029ને અમલમાં મુકવામાં આવે તે પણ એક સવાલ છે કારણ કે,જો કોઈ એક દેશ બીજા દેશને સુરક્ષિત કરવા પ્રયત્ન કરે તો તેને આક્રમણ સમજવામાં આવે તેવું પણ બને.
થોડા સમય પહેલા અમેરિકી વિદેશ મંત્રી માઈક પોમ્પિયોએ ઉત્તર કોરિયામાં ગમે તે સ્થિતિ હોય અમેરિકા પરમાણુ નિશસ્ત્રીકરણ અંગે કામ કરતું રહેશે તે અર્થનું નિવેદન આપ્યું હતું.અમેરિકાના હવાઈ ખાતે આવેલી થિંક ટેન્ક પેસિફિક ફોરમના રાલ્ફા કોસાએ જણાવ્યું કે,જો અમેરિકા પાસે ઉત્તર કોરિયા પહોંચવાનો અને ન્યૂક્લિયર હથિયારોને સુરક્ષિત કરવાનો પ્લાન ન હોય,જો હથિયારો ક્યાં છે તે ખબર ન હોય તો અમે અમારૂ કામ નથી કરી રહ્યા તેમ સાબિત થાય છે.
ઉલ્લેખનીય છે કે,ઉત્તર કોરિયા અને અમેરિકા અનેક વર્ષોથી એકબીજાના વિરોધી છે અને બંને દેશો યુદ્ધની ધમકીઓ પણ આપતા હોય છે.જો કે, ઉ.કોરિયાના શાસક કિમ જોંગ ઉન અને અમેરિકી રાષ્ટ્રપતિ ડોનાલ્ડ ટ્રમ્પની મુલાકાત બાદ સ્થિતિ અમુક હદ સુધી બદલાયેલી જોવા મળી રહી છે.ગત વર્ષે કિમ જોંગ અને ટ્રમ્પ વચ્ચેની વાર્તા દરમિયાન પણ અમેરિકાનું મુખ્ય ફોકસ ઉત્તર કોરિયાને પરમાણુ નિશસ્ત્રીકરણ માટે તૈયાર કરવાનું હતું.અગાઉ પરમાણુ હથિયારોના પરીક્ષણને લીધે અમેરિકાએ ઉત્તર કોરિયા પર તમામ પ્રકારના પ્રતિબંધો મુકી દીધા હતા.
