રોકાણકાર મિત્રો, આનંદ ને…!! તા.૧૭.૦૧.૨૦૨૨ ના રોજ…..
સેન્સેક્સ :- ઇન્ટ્રા ડે ટ્રેડીંગની શરૂઆતે બીએસઇ સેન્સેક્સ આગલા બંધ ૬૧૨૨૩.૦૩ સામે ૬૧૨૧૯.૬૪ પોઈન્ટના મથાળેથી ખુલીને ૬૧૧૦૭.૬૦ પોઈન્ટના નીચા મથાળેથી નવી લેવાલી દ્વારા સેન્સેક્સ આધારિત શેરોમાં તબક્કાવાર ખરીદીનો માહોલ જોવા મળ્યો… સરેરાશ ૨૭૭.૮૮ પોઈન્ટની મુવમેન્ટ નોંધાવી ભારતીય શેરબજારનો સેન્સેક્સ ૮૫.૮૮ પોઈન્ટના ઉછાળા સાથે ૬૧૩૦૮.૯૧ પોઈન્ટ મજબૂતી સાથે બંધ થયેલ..!!!
નિફ્ટી ફ્યુચર :- ઇન્ટ્રા ડે ટ્રેડીંગની શરૂઆતે નિફ્ટી ફ્યુચર આગલા બંધ ૧૮૨૯૫.૦૦ સામે ૧૮૨૪૮.૦૦ પોઈન્ટના મથાળેથી ખુલીને ૧૮૨૩૪.૫૦ પોઈન્ટના નીચા મથાળેથી નવી લેવાલી દ્વારા નિફ્ટી ફ્યુચર આધારિત શેરોમાં તબક્કાવાર ખરીદીનો માહોલ જોવા મળ્યો… સરેરાશ ૧૧૫.૫૦ પોઈન્ટની મુવમેન્ટ નોંધાવી નિફ્ટી ફ્યુચર ૪૪.૯૦ પોઈન્ટના ઉછાળા સાથે ૧૮૩૩૯.૯૦ પોઈન્ટ આસપાસ મજબૂતી સાથે બંધ થયેલ..!!!
સ્થાનિક / વૈશ્વિક પરિબળોની વાત કરીએ તો…
સપ્તાહના પ્રથમ દિવસે ભારતીય શેરબજારમાં ટ્રેડીંગની શરૂઆત સાવચેતીએ થઈ હતી. વિવિધ સાનુકૂળ / પ્રતિકૂળ પરિબળો પાછળ શેરબજારમાં વોલેટાલીટી જારી રહેવા છતાં પણ ગત સપ્તાહે બીએસઇ સેન્સેક્સમાં અંદાજીત ૨% સુધારો નોંધાયો હતો, તેની સામે પસંદગીના સ્મોલકેપ શેરોમાં ૪૭% સુધીના સુધારા નોંધાયા હતા. ઓમિક્રોનનું સંક્રમણ વધવા છતાં તે ઝડપથી કાબૂમાં આવી જવાના તેમજ હોસ્પિટલાઇઝેશન રેશિયો નીચો રહેવાના કારણે અહેવાલોની બજાર પર સાનુકૂળ અસર હતી. આ ઉપરાંત રિઝર્વ બેંક દ્વારા વ્યાજદર વધારવા પર બ્રેક માર્યાના અહેવાલોની બજાર પર પોઝીટીવ અસર થઈ હતી. આ ઉપરાંત કોર્પોરેટ પરિણામોની સીઝન સાનુકૂળ રહેવાના અહેવાલે આજે બે તરફી અફડાતફડીના અંતે ભારતીય શેરબજાર ઉછાળા સાથે બંધ રહ્યું હતું.
ગત સપ્તાહે બીએસઇ સેન્સેક્સ ૨.૪૭% એટલે કે ૧૪૭૮.૩૮ પોઇન્ટ વધ્યો હતો. જ્યારે નિફ્ટી ફ્યુચર ૨.૪૮% એટલે કે ૪૪૩ પોઇન્ટનો ઉછાળો નોંધાયો હતો. જ્યારે બીએસઇ મિડકેપ ૨% અને સ્મોલકેપ ૩% વધ્યા હતા. સેન્સેક્સ / નિફ્ટીની બીજી તરફ આ સમય દરમિયાન ૧૦૦ જેટલા પસંદગીના શેરોમાં ૧૦ થી ૪૭%ના ઉછાળા નોંધાયા હતા. તો બીજી તરફ પ્રતિકૂળ અહેવાલો પાછળ ૧૦ થી વધુ શેરો ૮ થી ૨૫% સુધી તૂટયા હતા. સૂચિત સમયમાં બીએસઇ મિડકેપ ઇન્ડેક્સમાં સામેલ પસંદગીના શેરો ૭ થી ૧૬% વધ્યા હતા. જ્યારે બીએસઇ – ૫૦૦ ઇન્ડેક્સના પસંદગીના શેરો ૧૫ થી ૩૧% સુધી વધ્યા હતા. આગામી દિવસોમાં પણ સ્થાનિક ફંડોની સતત લેવાલી અને વિદેશી ફંડોની પણ ફરી લેવાલીએ ભારતીય શેરબજારમાં તેજી જોવા મળે તેવી શક્યતા જોવાઈ રહી છે.
બીએસઇ પર મીડકેપ ઈન્ડેક્સ ૦.૨૩% અને સ્મોલકેપ ઈન્ડેક્સ ૦.૬૧% વધીને બંધ રહ્યા હતા. વિવિધ સેક્ટરલ ઈન્ડાયસીસની વાત કરીએ તો બીએસઈ પર માત્ર હેલ્થકેર, બેન્કક્સ અને ફાઈનાન્સ શેરોમાં વેચવાલી જોવા મળી હતી, જ્યારે અન્ય બીજા તમામ સેક્ટરલ ઈન્ડાયસીસ ઉછાળા સાથે બંધ રહ્યા હતા. બીએસઈમાં કુલ ટ્રેડીંગ થયેલી ૩૭૩૯ સ્ક્રિપોમાંથી ઘટનારની સંખ્યા ૧૩૦૮ અને વધનારની સંખ્યા ૨૨૯૭ રહી હતી, ૧૩૪ શેરના ભાવમાં કોઈ ફેરબદલ જોવાયો ન હતો. જ્યારે ૩૦૭ શેરોમાં ઓનલી સેલરની મંદીની નીચલી સર્કિટ સામે ૭૫૭ શેરોમાં ઓનલી બાયરની તેજીની ઉપલી સર્કિટ રહી હતી.
બજારની ભાવિ દિશા…. મિત્રો, આગામી દિવસોમાં રાજયોની આવી રહેલી ચૂંટણીઓ અને કેન્દ્રિય બજેટની તૈયારી સાથે કેન્દ્ર સરકાર માટે સૌથી મોટું ટાસ્ક એલઆઈસી ઓફ ઈન્ડિયાના ઐતિહાસિક – મેગા આઈપીઓને પાર પાડવાનું છે. ચાલુ વર્ષમાં એલઆઈસીના આઈપીઓને લાવીને સરકાર મેગા ડિસઈન્વેસ્ટમેન્ટ કરીને મહત્વની સિદ્વિ હાંસલ કરવા માગે છે. જેથી શકય છે કે આ મેગા ટાસ્કને લઈ સરકાર પણ નહીં ઈચ્છે કે નાના – મધ્યમ કરેકશન સિવાય બજારનું સેન્ટીમેન્ટ ખરાબ થાય. આ સમયે કોરોના મહામારી સાથે બીજું નેગેટીવ પરિબળ ફુગાવો – મોંઘવારીનું હોવા છતાં સેન્ટીમેન્ટ ખરાબ ન થાય એ માટે હાલ તુરત વ્યાજ દરમાં વધારો મોકૂફ રાખીને સિસ્ટમ, બજારોમાં નાણા પ્રવાહિતા કાયમ રાખવાનું સરકાર ઈચ્છશે. વૈશ્વિક મોરચે પણ અમેરિકા, યુરોપના દેશોમાં હાલ તુરત બોન્ડ ટેપરીંગ, સ્ટીમ્યુલસ પર કાપ નહીં લાગુ કરીને સ્ટીમ્યુલસ પેકેજ હાલ તુરત જાળવી રાખશે.
આ પરિબળો વચ્ચે આગામી દિવસોમાં બજારમાં અફડાતફડી વચ્ચે તેજીનું સેન્ટીમેન્ટ કાયમ રહેવાની શકયતા છે. ઉપરાંત પ્રમુખ જાહેર થનારા કોર્પોરેટ પરિણામોમાં અલ્ટ્રાટેક સિમેન્ટ, એલ એન્ડ ટી ટેકનોલોજી સર્વિસિઝ, બજાજ ઓટો અને લાર્સન એન્ડ ટુબ્રો, બજાજ ફિનસર્વ, હિન્દુસ્તાન યુનિલિવર, એશીયન પેઈન્ટસ, બજાજ હોલ્ડિંગ, રિલાયન્સ ઈન્ડસ્ટ્રીઝ લિમિટેડ અને એચડીએફસી લાઈફ ઈન્સ્યોરન્સના જાહેર થનારા પરિણામોની સીઝનમાં રોકાણકારોનું આકર્ષણ જળવાઈ રહેવાની શકયતા છે.
