અમદાવાદ : દેશ અને દુનિયાભરમાં ખૂબ જ પ્રતિષ્ઠિત એવી યુ.એન.મહેતા હોસ્પિટલની પ્રતિષ્ઠા જોખમાય તેવી પોસ્ટ વાયરલ કરનાર હોસ્પિટલના જ આરએમઓ ડો.કૌશિક રમણભાઇ બારોટની અમદાવાદ સાયબર ક્રાઇમ દ્વારા ધરપકડ કરવામાં આવી છે.ધરપકડ બાદ ડો.બારોટે પોતાને હોસ્પિટલના હોદ્દેદારો પરેશાન કરતા હોવાથી આવી પોસ્ટ કરી હોવાની કબૂલાત કરી હતી.બીજી તરફ હોસ્પિટલમાં આ ફરિયાદ અંતર્ગત મોટું રાજકારણ રમાયું હોવાની ચર્ચાએ જોર પકડ્યું છે.ડો.બારોટની ધરપકડ થતાં મોટું ટોળું સાયબર ક્રાઇમ બ્રાંચની ઓફિસ સુધી આવી ગયું હતું.જોકે ધરપકડના 24 કલાક બાદ ડો.કૌશિક બારોટને પોલીસ મથકમાંથી જ જામીન ઉપર મુક્ત કરવામાં આવ્યા હતા.યુ.એન.મહેતા હોસ્પિટલના એક કર્મચારી દ્વારા સાયબર ક્રાઇમ બ્રાંચમાં ફરિયાદ નોંધાવવામાં આવી હતી કે,છેલ્લા પાંચેક મહિનાથી દર્શન પટેલ નામનું એક ફેક ફેસબુક એકાઉન્ટ બનાવીને કોઇ અજાણી વ્યક્તિ હોસ્પિટલની પ્રતિષ્ઠા જોખમાય તેવી પોસ્ટ કરી રહી છે.સાથે સાથે જે તે વ્યકિત યુ.એન.મહેતા ઇન્સ્ટિટ્યૂટ,કાર્ડીઓલોજીસ્ટ એન્ડ રિસર્ચ સેન્ટરના પ્રતિષ્ઠીત ડોક્ટરો બાબતે ખોટી પોસ્ટ મુકી અફવા ફેલાવી તબીબોને પણ બદનામ કરે છે.સાથે સાથે આવી પોસ્ટની લિંક પણ હોસ્પિટલ સાથે સંકળાયેલા લોકોને મોકલે છે.
આ ફરિયાદને આધારે સાયબર ક્રાઇમના એસીપી જીતુ યાદવની ટીમે તપાસ શરૂ કરી હતી.પોલીસ ઇન્સ્પેકટર ગમારે ટેકનિકલ ટીમની મદદથી તપાસ કરતાં આ પોસ્ટ કરનાર વ્યક્તિ અન્યના નામના સીમ કાર્ડથી સમગ્ર ગેમ કરી રહી હોવાનું સામે આવ્યું હતું.સાથે સાથે વોઇસ ચેન્જ કરતી એપ્લિકેશનની મદદથી છોકરીના અવાજનો ઉપયોગ કરી પોસ્ટ કરતો હતો.તપાસમાં એવી ચોંકાવનારી વિગતો સામે આવી હતી કે,આ તમામ કામગીરી હોસ્પિટલના જ RMO ડો.કૌશિક રમણલાલ બારોટ કરી રહ્યા હતા.જેથી પોલીસે ડો.બારોટની ધરપકડ કરી તપાસ શરૂ કરી છે.ડો.બારોટ વર્ષ 2004થી હોસ્પિટલમાં ફરજ બજાવે છે. જયારે વારંવાર સિનિયર તબીબો અને હોદ્દેદારો સાથે જુદા જુદા મુદ્દે તેઓ તકરાર કરીને વિવાદ ઉભો કરતો હોવાના તેમની સામે આક્ષેપ થઇ રહ્યા છે.જોકે હોસ્પિટના ઘણા કર્મચારીઓ દ્વારા ડો.બારોટનો ખુલ્લો વિરોધ કરવામાં પણ આવી રહ્યો છે.પ્રાથમિક તપાસમાં એવું જાણવા મળ્યું હતું કે, છેલ્લા ખાસ્સા સમયથી હોસ્પિટલના સિનિયર તબીબો વચ્ચે કોલ્ડવોર ચાલી રહ્યું છે.સાથે સાથે હોસ્પિટલના સત્તાધીશો અને સિનિયરો દ્વારા બારોટને પરેશાન કરવામાં આવતા હોવાથી તેણે આવું કૃત્ય કર્યું હતું.
