ઓક્લાહોમા : અમેરિકામાં અંધાધૂંધ ગોળીબારના વધુ એક કિસ્સામાં બુધવારે ચાર લોકોનાં મૃત્યુ થયા હતા.પોલિસના જણાવ્યા અનુસાર રાઇફલ અને હેન્ડગન સાથેની એક વ્યક્તિએ એક હોસ્પિટલ કેમ્પસના તુલસા મેડિકલ બિલ્ડિંગમાં ફાયરિંગ કર્યું હતું.ઉલ્લેખનીય છે કે,છેલ્લા કેટલાક સપ્તાહમાં અમેરિકામાં આડેધડ ફાયરિંગની ઘણી ઘટના બની છે.તુલસા પોલિસ ડિપાર્ટમેન્ટના ડેપ્યુટી ચીફ એરિક ડેલગ્લિશે મૃતકોની સંખ્યા અંગે પુષ્ટિ કરી હતી અને જણાવ્યું હતું કે,ફાયરિંગ કરનાર વ્યક્તિ પણ મૃત્યુ પામી હતી.તેણે પોતાને જ ગોળી મારી હતી. છેલ્લા કેટલાક સમયમાં અમેરિકાના અંધાધૂંધ ગોળીબારના કિસ્સા વધ્યા છે.
આઠ દિવસ પહેલાં ટેક્સાસ એલિમેન્ટ્રી સ્કૂલ ખાતે ૧૮ વર્ષના એક યુવકે એઆર-સ્ટાઇલની ઓટોમેટિક રાઇફલ દ્વારા ૧૯ બાળકો અને બે શિક્ષકને મોતને ઘાટ ઉતાર્યા હતા.તાજેતરની ઘટનાને પગલે ડેમોક્રેટિક પક્ષના નેતાઓની બંદૂક પર વધુ નિયંત્રણ લાદવાની માંગણીને બળ મળ્યું છે.જ્યારે રિપબ્લિકન પાર્ટી શાળાઓમાં સુરક્ષા વધારવા પર ભાર મૂકી રહી છે.પોલિસ અને હોસ્પિટલના અધિકારીઓએ જણાવ્યું હતું કે,તેઓ મૃતકોની ઓળખ માટે તૈયાર ન હતા.નતાલી મેડિકલ સંકુલ ખાતેની સ્થિતિને લીધે સેન્ટ ફ્રાન્સિસ હેલ્થ સિસ્ટમે બુધવારે તેનું કેમ્પસ લોક કરી દીધું હતું.
