18 વર્ષથી ચાલી રહેલા યુદ્ધની સમાપ્ત થવાની આશાને તાલિબાને ખોરવી નાખી
એજન્સી, કાબુલ:
અફઘાનિસ્તાનમાં શાંતિના પ્રયત્ન કરી રહેલા અમેરિકાને ફરી એકવાર ઝટકો લાગ્યો છે. અમેરિકા સાથે શાંતિ કરાર કર્યા પછી તાલિબાને સોમવારે જાહેરાત કરી હતી કે તે આંશિક સંઘર્ષ વિરામ ખતમ કરવાની સાથે જે અફઘાનિસ્તાનના સુરક્ષા દળો વિરુદ્ધ ફરીથો ઓપરેશન શરુ કરશે. આ આંશિક સંઘર્ષ વિરામની જાહેરાત ચરમપંથીઓ અને અમેરિકા વચ્ચે થયેલા શાંતિ કરાર પહેલા કરવામાં આવી હતી.
તાલિબાનના ચરમપંથી નેતા જબીહુલ્લાહે આ અંગે જાહેરાત કરતા કહ્યુ કે, હવે હિંસા કરવામાં નહિ આવે અને અમારુ અભિયાન સામાન્ય રીતે ચાલુ રહેશે. જબીહુલ્લાહે કહ્યું કે અમેરિકા-તાલિબાન શાંતિ કરાર મુજબ આપણા મુજાહિદ્દીન વિદેશી દળો પર હુમલો નહિ કરે, પરંતુ અફઘાન પ્રશાસન વાળા દળો વિરુદ્ધ અમારુ અભિયાન ચાલુ રહેશે.
જોકે આ શાંતિ કરાર પછી અફઘાનિસ્તાનના રાષ્ટ્રપતિ અશરફ ગનીએ અમેરિકા-તાલિબાન કરારના એક મહત્વના ભાગને સરેઆમ વિરોધ કરતા હજારો ચરમપંથી કેદીઓને છોડવાથી ઇનકાર કર્યો હતો. કરારમાં તમામ વિદેશો સુરક્ષા દળોને પરત ખેંચી લેવા માટે 14 મહિનાનો સમય નક્કી કરવામાં આવ્યો હતો, જેની સામે તાલિબાને કેટલીક શરતો મંજૂર રાખવાની હતી.
આંશિક શાંતિ કરારથી ખુશ થયેલા અફઘાનિસ્તાનીઓ રોડ પર ઝૂમી ઉઠ્યા હતા, કરાર પછી એવી આશા જાગી હતી કે અફઘાનિસ્તાનનું 18 વર્ષથી ચાલી રહેલુ યુદ્ધ હવે સમાપ્ત થશે.
