-બારડોલી શુગર ફેક્ટરીમાં હાલમાં 8 હજાર હેક્ટરમાં પાક ઉભેલો છે
બારડોલી,
કોરોનાને કારણે શુગર ફેક્ટરીઓની પણ માઠી દશા બેસવા જઇ રહી છે. હજારોની સંખ્યામાં મજૂરોએ ગામ તરફ હિજરત કરતાં બારડોલી સહિત દક્ષિણ ગુજરાતની શુગર ફેક્ટરીઓની હજારો હેક્ટર શેરડીનો પાક કપાયા વગર રહી જવાની સંભાવના છે. જેને કારણે દક્ષિણ ગુજરાતના ખેડૂતોને કરોડો રૂપિયાનું નુકસાન થવાની સંભાવના છે.
આ અંગે મળતી માહિતી અનુસાર કોરોના વાઇરસને કારણે લોક ડાઉન બાદ બાંધકામ ઉદ્યોગ સાથે સંકળાયેલા હજારો મજૂરોના સામૂહિક હિજરત બાદ હવે શુગર ફેક્ટરીઓમાં શેરડી કાપવા માટે મહારાષ્ટ્ર, મધ્યપ્રદેશ અંગે ગુજરાતના ડાંગ, તાપી જિલ્લામાંથી આવેલા મજૂરો પણ ધીમે ધીમે ગામ ભણી પ્રયાણ કરી રહ્યા છે. મજૂરોને તેમના ગામના સરપંચોને બે દિવસની અંદર ગામમાં આવી જવા માટે સૂચના આપી દેવામાં આવી છે જો તેઓ સમય પર ગામમાં નહીં આવે તો ગામમાં પ્રવેશ પર પ્રતિબંધ મૂકી દેવાનો આદેશ કરવામાં આવ્યો છે. જેને લઈને મજૂરો પણ અવઢવમાં મુકાયા છે. એક તરફ બારડોલી શુગર ફેક્ટરીમાં ટ્રક ચાલકોની ધમાલ બાદ 48 જેટલા લોકોની ધરપકડ કરી દેતાં ઘણી ટ્રકો થંભી ગઈ છે, જેને કારણે ખેતરોમાં કપાયેલી શેરડી પડી રહેવાની સંભાવના છે. બારડોલી શુગર ફેક્ટરીની જ વાત કરીએ તો હજી પણ શુગર ફેક્ટરીની 8 હજાર હેક્ટર જમીનમાં ઊભેલી શેરડી કાપવાની બાકી છે. જ્યારે કામરેજને બાદ કરતાં અન્ય સુગર મિલોમાં પણ 4 થી 5 હજાર હેક્ટર જમીનમાં શેરડી ઊભેલી છે. આવા સમયે હવે મજૂરો પણ કોરોનાના ભયને લીધે પોતાના ગામ તરફ જઈ રહ્યા હોય શેરડી કપાવા વગરની પડી રહેવાની સંભાવના છે. જો આવું બનશે તો દક્ષિણ ગુજરાતના ખેડૂતોને મોટું નુકસાન જવાની શક્યતા છે. એક તરફ કોરોનાનો કેરને કારણે હાલ નોકરી ધંધા પણ થંભી ગયા છે ત્યારે શેરડી ન કપાય તો એક માત્ર ખેતીના ભરોસે બેઠેલા નાના ખેડૂતોની હાલત વધુ દયનીય થઈ જશે. સરકાર અને સહકારી આગેવાનોએ આ મામલે સંકલન કરી યોગ્ય નિરાકરણ લાવવું જરૂરી છે.
