– આવેદનપત્ર,રેલીઓ,મહાસંમેલન અને પશુ સાથે રાખી રેલી જેવા કાર્યક્રમો ઘડવામાં આવશે તેવી રણનીતિ નક્કી કરાઈ છે.
ગાંધીનગર : રાજ્ય સરકાર દ્વારા રસ્તે રખડતા ઢોર મુદ્દે લાવવામાં આવેલા કાયદા સામે હવે માલધારીઓ આંદોલન કરવાના મૂડમાં છે.ગાંધીનગર જિલ્લાનાં ટીટોડા ગામમાં આવેલા માલધારી સમાજની ગુરુ ગાદી શ્રી રામજી મંદિર ખાતે મળેલી માલધારી સમાજની મિટિંગમાં ગુજરાત સરકાર દ્વારા લાવવામાં આવેલા રખડતાં ઢોરના કાયદા સામે માલધારી સમાજ દ્વારા આંદોલનનું રણશિંગુ ફુકવામાં આવ્યું છે.જેમાં આવેદનપત્ર,રેલીઓ,મહાસંમેલન અને પશુ સાથે રાખી રેલી જેવા કાર્યક્રમો ઘડવામાં આવશે તેવી રણનીતિ નક્કી કરાઈ છે.
વિવિધ કાર્યક્રમોની તબક્કાવાર જાહેરાતો કરવામાં આવશે
ગુજરાત માલધારી મહાપંચાયત દ્વારા ધારાસભ્ય રઘુ દેસાઈ અને ધારાસભ્ય લાખા ભરવાડે આગામી દિવસોમાં આંદોલનનું રણશિંગુ ફુંકતા જણાવ્યું હતું કે સોમવારથી ગુજરાતનાં તમામ જિલ્લાઓમાં કાળા કાયદાનાં વિરુધ્ધમાં તમામ જિલ્લા કલેક્ટરને આવેદન પત્ર ગુજરાત માલધારી મહાપંચાયતનાં નેજા હેઠળ આપવામાં આવશે. ત્યારબાદ વિવિધ કાર્યક્રમોની તબક્કાવાર જાહેરાતો કરવામાં આવશે.કાર્યક્રમો આશ્ચર્યજનક,રેલી સ્વરૂપે,પશુઓ સાથેની રેલી,મહાસંમેલનો જેવાં વિવિધ કાર્યક્રમો ઘડી કાઢવામાં આવ્યા છે.
સોમવારે આવેદનપત્ર આપશે,ધારાસભ્યો પણ જોડાશે
જેના ભાગરૂપે અમદાવાદ કલેક્ટર કચેરીએ સોમવારે સવારે 10 વાગ્યે આવેદન પત્ર આપવામાં આવશે. જેમાં ધારાસભ્ય રઘુ દેસાઈ, ધારાસભ્ય લાખા ભરવાડ સહિતના આગેવાનો જોડાશે.તેમની સાથે મોટી સંખ્યામાં માલધારી સમાજ ઉમટી પડશે. માલધારી સમાજની મહત્વની મિટિંગમાં વિવિધ રાજકીય હોદ્દેદારો,માલધારી સમાજનાં આગેવાનો,સામાજિક આગેવાનો તેમજ મોટી સંખ્યામાં માલધારી સમાજ ઉપસ્થિત રહ્યો હતો.
આ બિલથી ભ્રષ્ટાચારની બારી ખુલી ગઈ : માલધારીઓ
માલધારી સમાજની મિટિંગમાં ગુજરાતનાં તમામ જિલ્લાઓમાંથી માલધારીઓ આવ્યા હતા.તેઓનો આક્રોશ હતો કે, તાજેતરમાં ગુજરાત સરકાર જે બિલ લાવી છે,તેની વાસ્તવિકતા પ્રજા સમક્ષ અલગ રજુ કરી છે.ગુજરાત સરકાર દ્વારા બિલનું નામ આપવામાં આવ્યું છે કે રખડતા ઢોરો મુખ્ય માર્ગો ઉપર આવે છે.જેનાથી અકસ્માતો થાય છે.ખરેખર તો માલધારી સમાજે વારંવાર ગુજરાત સરકારને રજૂઆત કરેલી છે કે રોડ-રસ્તા ઉપર મહાનગર પાલિકામાં પશુઓ આવતા હોય તેઓને ડબ્બામાં પુરવા જોઈએ તેની સામે ભૂતકાળની જેમ માલધારી વસાહતો બનાવી આ પ્રશ્ન હલ કરવો જોઈએ.પરંતુ ગુજરાત સરકાર પ્રજાને ગેરમાર્ગે દોરીને પોતાની ભ્રષ્ટાચારની વાત છુપાવી રહી છે.આ બિલથી ભ્રષ્ટાચારની બારી ખુલી ગઈ છે.જેમકે શહેરોમાં ગામડાઓ ભેળવીને ગામડાઓમાં આવેલા ગૌચરો તેમજ સરકારી પડતર જમીનો પોતાના માનીતા ઉદ્યોગપતિઓને પધરાવી દેવાનું આ બિલ છે.
