અમદાવાદ : શહેરના કૃષ્ણનગરમાં પોલીસ કર્મચારીની દાદાગીરીની ઘટના આવી સામે છે.જેમાં એક સિનિયર સિટીઝન પર હુમલો કરતા પોલીસ સામે ફરિયાદ નોંધાઈ છે.અગાઉ કરેલી ફરિયાદની અદાવત રાખીને પોલીસ કર્મચારી અને તેના મિત્રોએ હુમલો કર્યો.આ ઘટનાથી રહીશોમાં દહેશત ફેલાઈ છે.આ સમગ્ર મામલે હાલ કૃષ્ણનગર પોલીસે તપાસ હાથ ધરી છે.સોસાયટીના સીસીટીવી ફુટેજના દ્રશ્યોમાં પોલીસ કર્મચારી અને તેના મિત્રોની દાદાગીરી કેદ થઈ છે.એક સિનિયર સીટીઝન એક્ટિવા પર ઘરે પરત ફર્યા ત્યારે તેમને અટકાવીને હુમલો કર્યો.
અદાવત રાખીને વૃદ્ધ પર પોલીસનો હુમલો
ઘટનાની વાત કરીએ તો, કૃષ્ણનગર મહાસુખનગરમાં રહેતા 63 વર્ષીય કનકભાઈ શાહે અગાઉ પોલીસ કર્મચારી ભાવેશ રાવલ અને તેના મિત્ર ભાર્ગવ પટેલે સોસાયટીની ઓફીસમાં પ્રવેશ કરીને ધમકી આપતા ફરિયાદ નોંધાવી હતી.જેની અદાવત રાખીને ભાવેશ રાવલ,ભાર્ગવ પટેલ અને તેના મિત્રો તેમજ પરિવાજનોએ લાકડા અને પાઇપોથી કનકભાઈ પર હુમલો કરતા તેઓ ગંભીર રીતે ઇજાગ્રસ્ત થયા હતા. તેમને સારવાર માટે ખાનગી હોસ્પિટલમાં ખસેડવામાં આવ્યા હતા.આ ઘટનાથી સ્થાનિકોમાં દહેશત ફેલાઈ ગઈ હતી.
સોસાયટીમાં ચૂંટણી હારી જતા કમિટી સભ્યો સાથે ઝઘડો કર્યો
ભાવેશ રાવલ ગાંધીનગરમાં CID ક્રાઇમમાં ફરજ બજાવે છે.છેલ્લા 10 વર્ષથી આ સોસાયટીમાં રહે છે.ભાવેશ રાવલ અને તેનો મિત્ર ભાર્ગવ પટેલની સોસાયટીમાં દાદાગીરી હોવાનો આરોપ રહીશે લગાવ્યો છે.માર્ચ માસમાં સોસાયટીના ચેરમેનનું ઇલેક્શન હતું,ત્યારે ભાર્ગવ પટેલ ઇલેક્શનમાં ઉભા હતા. પરંતુ ઇલેક્શન હારી જતા તેઓએ સોસાયટીના કમિટી મેમ્બર સાથે તકરાર અને દાદાગીરી શરૂ કરી.સોસાયટીમાં પ્રવેશ ગેટ લગાવતા મેં મહિનામાં ભાવેશ રાવલે કમિટી મેમ્બર કનકભાઈ શાહ સાથે ઝઘડો કરીને ધમકી આપી હતી.જેની ફરિયાદ નોંધાઈ હતી.
જૂની ફરિયાદની અદાવત રાખી હુમલો
આ ફરિયાદની અદાવત રાખીને કનકભાઈ પર ફરી હુમલો કરવામાં આવ્યો.એટલું જ નહીં આ બન્ને મિત્રોએ સોસાયટીના અનેક લોકોને માર માર્યો હોવાનો આક્ષેપ રહીશોએ કર્યો હતો.હાલમાં કૃષ્ણનગર પોલીસે ગુનો નોંધી વધુ તપાસ શરૂ કરી છે. સોસાયટીમાં પોલીસ કર્મચારીની દાદાગીરીથી રહીશો પરેશાન છે.એક તરફ કાયદાનો રક્ષક કાયદો હાથમાં લઈને દાદાગીરી કરે છે,જ્યારે બીજી તરફ પોલીસ કર્મચારી હોવાથી પોલીસ છાવરી રહી હોવાનો રોષ રહીશોએ વ્યક્ત કર્યો હતો.ત્યારે સોસાયટીના વિવાદ વચ્ચે ફરી પોલીસની છબી પર સવાલ ઉઠ્યા છે.
હુમલાની ઘટના સીસીટીવી કેમેરામાં કેદ થઈ
કનકભાઈ પર જીવલેણ હુમલો કરાતા સોસાયટીના રહીશો ભેગા થઈ ગયા હતા અને કનકભાઈને હોસ્પિટલમાં સારવાર અર્થે લઈ ગયા હતા.કોન્સ્ટેબલ અને તેના મિત્રોએ કરેલા જીવલેણ હુમલાની ઘટના સીસીટીવી કેમેરામાં કેદ થઈ ગઈ છે, જેના આધારે પોલીસે તપાસ હાથ ધરી છે.
મેમાં ગેટ લગાવાતાં ભાવેશે ઝઘડો કર્યો હતો
મહાસુખનગરમાં કોન્સ્ટેબલ ભાવેશ રાવલ અને તેનો મિત્ર ભાર્ગવ પટેલ 10 વર્ષથી રહે છે.માર્ચમાં યોજાયેલી સોસાયટીના ચેરમેન તરીકેની ચૂંટણીમાં ભાર્ગવ પટેલ હારી ગયા હતા.આથી તેમણે સોસાયટીના કમિટીના સભ્યો સાથે દાદાગીરી શરૂ કરી હતી. સોસાયટીમાં પ્રવેશ ગેટ લગાવાતાં મે મહિનામાં ભાવેશ રાવલે કમિટી મેમ્બર કનકભાઈ શાહ સાથે ઝઘડો કરી ધમકી આપી હતી.આ અંગે કનકભાઈએ પોલીસ ફરિયાદ નોંધાવી હતી.
