ભરૂચ : આમોદ ખાતે જંબુસર વિધાનસભા બેઠકના કોંગ્રેસના ઉમેદવાર અને વર્તમાન ધારાસભ્ય સંજય સોલંકીના ચૂંટણી પ્રચાર અર્થે યોજાયેલી જાહેરસભામાં સ્થાનિક રહીશોએ ધારાસભ્ય પાંચ વર્ષ સુધી ક્યાં હતા તેમ પૂછતાં કોંગ્રેસના આગેવાનો રોષે ભરાયા હતા અને માહોલ એટલો ગરમાયો હતો કે સ્થાનિક રહીશો અને કોંગ્રેસના આગેવાનો વચ્ચે છૂટા હાથની મારમારી સુધી વાત પહોંચી ગઇ હતી.
આમોદમાં કોંગ્રસના ઉમેદવાર સંજયસિંહ સોલંકીના ચૂંટણી પ્રચાર અર્થે આમોદ ખાતે પુરષા રોડ પર આવેલ નવી નગરીમાં જાહેરસભાનું આયોજન કરવામાં આવ્યું હતું.આ જાહેરસભા દરમિયાન સ્થાનિક રહીશોએ જંબુસર વિધાનસભા બેઠકના કોંગ્રેસના ઉમેદવાર અને વર્તમાન ધારાસભ્યને પાંચ વર્ષ બાદ દેખાયા હોવાનું કહેતા જાહેર સભામાં હાજર કોંગ્રેસના આગેવાનોને ગુસ્સો આવી ગયો હતો અને સ્થાનિક રહીશોને જાહેરસભા છોડી જતા રહેવાનું કહેતા માહોલ ગરમાયો હતો અને કોંગ્રેસના આગેવાનો અને સ્થાનિક રહીશો વચ્ચે ઉગ્ર બોલાચાલી થઇ હતી અને જોત જોતામાં સમગ્ર મામલાએ ઉગ્ર સ્વરૂપ ધારણ કરતા કોંગ્રેસના આગેવાનો અને સ્થાનિકો વચ્ચે છૂટા હાથની મારામારી સર્જાઇ હતી.
સમગ્ર મામલે આમોદ પોલીસ મથકમાં ફરિયાદ કરવામાં આવતા પોલીસે એક ઈસમની ધરપકડ કરી અન્ય આરોપીઓને ઝડપી પાડવાના ચક્રો ગતિમાન કર્યા હતા અને પોલીસે આમોદ નગરપાલિકાના માજી પ્રમુખ તેમજ તાલુકા કોંગ્રેસના માજી પ્રમુખ વિરુદ્ધ રાયોટીંગ ગુનો દાખલ કરી વધુ તપાસ હાથ ધરી છે તો બીજી બાજુ સભામાં માહોલ ગરમાતા કોંગ્રેસના વર્તમાન ધારાસભ્ય અને જંબુસર વિધાનસભા બેઠકના ઉમેદવાર સંજયસિંહ સોલંકીને સ્થળ છોડી ભાગવાનો વારો આવ્યો હતો.
