વલસાડ : વલસાડ સિટી પોલીસ અને રૂરલ પોલીસ મથકના 3 પોલીસ કોન્સ્ટેબલોની તાત્કાલિક અસરથી અન્ય પોલીસ મથકોએ બદલીનો હુકમ એસપીએ કર્યો છે.લાંબા સમયથી એક જ પોલીસ મથકમાં ફરજ બજાવવાની ફરિયાદ રેન્જ આઇજી અને એસપી સુધી પહોંચી હતી.
વલસાડ જિલ્લા પોલીસવડા ડો.રાજદિપસિંહ ઝાલા દ્વારા કરાયેલા હુકમ મુજબ વલસાડ શહેરના સિટી પોલીસ મથકમાં ફરજ બજાવતા કોન્સ્ટેબલ રાજકુમાર ઉપાધ્યાયની જિલ્લા પોલીસ હેડ ક્વોર્ટરમાં બદલી કરવામાં આવી છે.જ્યારે વલસાડ રૂરલ પોલીસ મથકના કોન્સ્ટેબલ કમલેશ મણિલાલને વાપી ટાઉન પોલીસ મથકે અને રૂરલના જ એક બીજા કોન્સ્ટેબલ વરુણ દિપકભાઇની ભીલાડ પોલીસ સ્ટેશનમાં બદલી કરવામાં આવી છે.
સૂત્રો દ્વારા મળતી માહિતી મુજબ આ પોલીસ કોન્સ્ટેબલો એક પોલીસ મથકમાં લાંબા સમયથી ફરજ બજાવી રહ્યા હોવા અંગેની ફરિયાદ રેન્જ આઇજી અને એસપીને કરવામાં આવી હતી.બદલીના હુકમના પગલે પોલીસ બેડામાં ફફડાટ પેસી ગયો હતો. વલસાડની જેમ વાપી સહિત અનેક પોલીસ સ્ટેશનમાં કેટલાક પોલીસકર્મીઓ વર્ષોથી એકજ જગ્યાએ હોવાની બૂમો ઉઠી રહી છે.જિલ્લા પોલીસવડા આવા પોલીસકર્મીઓની તાત્કાલિક અન્ય સ્થળોએ બદલી કરે તેવી માગ પણ ઉઠી રહી છે.એક જ જગ્યાએ વર્ષોથી ટકી રહેતા અનેક શંકાકુશંકા સેવાઇ રહી છે.
