કામરેજ : ગુજરાતમાં દારૂબંધી વચ્ચે બુટલેગરો દ્વારા દારૂની હેરાફેરી માટે અવનવી તરકીબો અજમાવવામાં આવી રહી છે.બીજી તરફ પોલીસ દ્વારા પણ વિદેશી દારૂની હેરફેર રોકવા કવાયત હાથ ધરાઈ છે.ત્યારે સુરત જિલ્લા એલસીબી પોલીસે કામરેજ તાલુકાનાં ઘલા પાટિયા નજીકથી બાતમીના આધારે એક કારમાં ચોરખાનું બનાવી લઈ જવાતો વિદેશી દારૂનો જથ્થો ઝડપી પાડયો હતો.પોલીસે વિદેશી દારૂ તેમજ કાર સહિત કુલ 2.10 લાખના મુદ્દામાલ સાથે બે વ્યક્તિને ઝડપી પાડ્યા હતા.જ્યારે બે વ્યક્તિને વોંટેડ જાહેર કર્યા છે.
સુરત જિલ્લા એલસીબી પોલીસની ટીમ ગતરોજ પેટ્રોલીંગમાં હતી.તે દરમ્યાન ઘલા પાટિયા થઈ સુરત શહેરમાં એક કારમાં વિદેશી દારૂનો જથ્થો છુપાવી લઈ જનાર હોવાની બાતમી પોલીસને મળી હતી.મળેલ બાતમીના આધારે પોલીસે ઘલા પાટિયા રોડ ઉપર વોચ ગોઠવી હતી.દરમ્યાન બાતમી મુજબની એક હોન્ડા સિટી કાર નંબર એમ.એચ-01-વાયએ-1146 આવતા પોલીસે તેને અટકાવી હતી.પોલીસે કારની તલાશી લેતાં કારમાં બનાવેલ ચોરખાનું મળી આવ્યું હતું અને તેમાં છુપાવેલ વિદેશી દારૂની કુલ 283 બોટલ કિંમત રૂ. 55,250 નો જથ્થો મળી આવ્યો હતો.પોલીસે કારમાંથી બે વ્યક્તિને ઝડપી પાડયા હતા.જેના નામ-ઠામ અંગે પુછપરછ કરતા તેમણે પોતાનું નામ મોહમદસાહીદ હબીબુલહક્ક અંસારી (રહે, રામપુરા, છરાવલ મહોલ્લો,સુરત શહેર) તથા રવિ અશોકભાઇ રાઠોડ (રહે, ફૂલવાડી, લાપસીવાલાની ચાલ,ઝૂપડપટ્ટીઆ,લાલગેટ સુરત શહેર) ને ઝડપી પાડ્યા હતા પોલીસે કાર તેમજ વિદેશી દારૂ અને મોબાઈલ ફોન મળી કુલ 2.10 લાખનો મુદ્દામાલ કબ્જે કર્યો હતો.જ્યારે આ ગુનામાં સંડોવાયેલ અલ્પેશ પટેલ (રહે, સેલવાસ) તથા વિક્કી સુમરા ઉર્ફે પપ્પુ (રહે, રામપુરા, સુરત શહેર0 ને વોંટેડ જાહેર કરી ગુનો નોંધી આગળની કાર્યવાહી હાથ ધરી છે.
