નવી દિલ્હી : કેદારનાથમાં એક હેલિકોપ્ટર ક્રેશ થયું છે.આ અકસ્માતમાં પાયલટ સહિત સાત લોકોના મોત થયા છે.આ ઘટનાના કારણે કેદારનાથમાં હેલી સેવાઓને આગામી આદેશ સુધી બંધ કરવામાં આવી છે.કેદારનાથમાં હજુ પણ હવામાન ખરાબ છે. અહીં બરફ પડી રહ્યો છે.
SDRF અને NDRFની ટીમોએ રેસ્ક્યૂ શરુ કર્યું
હેલિકોપ્ટરમાં પાયલટ સહિત સાત લોકો સવાર હતા.કેદારનાથથી લગભગ 3 કિમી દૂર નંદી પાસે હેલિકોપ્ટર ક્રેશ થયું હતું.હેલિકોપ્ટરે કેદારનાથ બેઝ કેમ્પથી નારાયણ કોટી-ગુપ્તકાશી માટે ઉડાન ભરી હતી.હેલિકોપ્ટર આર્યન કંપનીનું છે. DIG SDRF રિદ્ધિમા અગ્રવાલે જણાવ્યું કે કેદારનાથથી SDRFની ટીમ ઘટનાસ્થળે પહોંચી ગઈ છે.લીંચોલીથી ટીમ પહોંચી રહી છે.કેન્દ્રીય નાગરિક ઉડ્ડયન મંત્રી જ્યોતિરાદિત્ય સિંધિયાએ પણ હેલિકોપ્ટર ક્રેશ દુર્ઘટના પર દું:ખ વ્યક્ત કર્યું છે.આ ઘટનામાં રાહત તેમજ બચાવ કાર્ય માટે ટીમો રવાના થઈ ગઈ છે.કહેવામાં આવી રહ્યું છે કે કેદારનાથમાં ગાઢ ધુમ્મસ છે.જેથી આ કારણે હેલિકોપ્ટર અકસ્માતનો શિકાર બન્યું હોય.
2019માં પણ કેદારનાથમાં ક્રેશ થયુ હતુ હેલિકોપ્ટર
વર્ષ 2019માં કેદારનાથમાં હેલિકોપ્ટર ક્રેશ થયુ હતું. કેદારનાથથી યાત્રીઓને લઈને ફાટા માટે ઉડાન ભરતા સમયે હેલિકોપ્ટરમાં ટેક્નિકલ ખામી આવવાથી પાયલટને ઈમરજન્સી લેન્ડિંગ કરવી પડી હતી અને આ દરમિયાન હેલિકોપ્ટર ક્રેશ થયુ હતું.હેલિકોપ્ટરના લેન્ડિંગ સમયે પાછળનો કેટલોક ભાગ જમીન સાથે અથડાવવાથી આ દુર્ઘટના બની હતી. હેલિકોપ્ટરના પાયલટ સહિત છ યાત્રીઓને કોઈ નુકસાન થયુ ન હતું.
2013માં આપત્તિ રાહત બચાવ દરમિયાન ત્રણ હેલિકોપ્ટર ક્રેશ થયા હતા
કેદારનાથમાં હેલિકોપ્ટર ક્રેશ થવાની આ પહેલી ઘટના નથી. 2013ની કેદારનાથ દુર્ઘટના દરમિયાન વાયુસેનાના એમઆઈ-17 હેલિકોપ્ટર સહિત ત્રણ હેલિકોપ્ટર બચાવ કાર્ય દરમિયાન ક્રેશ થઈ ગયા હતા.આ અકસ્માતોમાં 23 લોકોએ જીવ ગુમાવ્યા હતા.
