ભાવનગરનો બોગસ બિલિંગ કૌભાંડના મુખ્ય સૂત્રધાર ભાવનગરના મોહમ્મદ શબ્બીરઅલી સવજાણી ઊર્ફે મોહમ્મદ ટાટાની ગુડ્સ એન્ડ સર્વિસ ટેક્સ કચેરીના અધિકારીઓ ગઈકાલે ધરપકડ કરી હતી.બોગસ બિલિંગ કરીને રૂ. ૧૩૪.૯૮ કરોડની ગેરકાયદેસર ઇનપુટ ટેક્સ ક્રેડિટ મેળવી હતી.મોડી સાંજે આરોપી મોહમ્મદ ટાટાની જ્યુડિશિયલ કસ્ટડી માટે કોર્ટમાં રજૂ કરવામાં આવ્યો હતો.ગરીબ અને કમાણી ન ધરાવતા જેટલા લોકોના કે.વાય.સી. મેળવીને મોહમ્મદ ટાટાએ ૧૨૧ જેટલી બાગસ કંપનીઓના રજિસ્ટ્રેશન મેળવ્યા હતા.આ કંપનીઓના નામથી બોગસ બિલ ઇસ્યૂ કરીને તેના પર અંદાજે રૂ. ૧૩૪.૯૮ કરોડની બોગસ ઇનપુટ ટેક્સ ક્રેડિટ લીધી હોવાનું અત્યાર સુધીની તપાસમાં બહાર આવ્યું છે.
આ કૌભાંડમાં અત્યાર સુધીમાં ૧૦ જણની ધરપકડ કરવામાં આવી છે.આ કૌભાંડમાં ગુડ્સ એન્ડ સર્વિસ ટેક્સની ભાવનગર કચેરીના તમામ અધિકારીઓ સંડોવાયેલા હોવાનુ જણાતા તેમની બદલી અને સસ્પેન્શનના પગલાં લેવાયા હતા.જોકે આજે સવા વર્ષને અંતે પણ તેમની સામેની તપાસ પૂરી થઈ નથી.એડિસનલ કમિશનર મિલિંદ કાવટકરે આજે આ અંગે પત્રકાર પરિષદમાં માહિતી આપતા જણાવ્યું હતું કે સમગ્ર કૌભાંડનો મુખ્યસૂત્રધાર મોહમ્મદ સવજાણી હોવાનું તપાસમાં બહાર આવ્યું છે.મોહમ્મદ ટાટા તરીકે પણ ઓળખાતી આ વ્યક્તિઓ ગરીબ અને જરૃરિયાદ મંદના કે.વાય.સી. મેળવીને તેને આધારે કંપનીઓના નામના રજિસ્ટ્રેશન મેળવ્યા હતા.તેમાંથી માલની હેરફેર કર્યા વિના જ બોગસ બિલ ઇશ્યૂ કરીને તેને આધારે ગેરકાયદેસર ઇનપુટ ટેક્સ ક્રેડિટ લેવાનું કૌભાંડ ચાલુ કરી દેવામાં આવ્યું હતું.
આ કૌભાંડમાં ઇનપુટ ટેક્સ ક્રેડિટ તરીકે નાણાં ઉપાડવા માત્ર બોગસ બિલ જ ઇશ્યૂ કરીને બીજાના ખાતામાં તેની ટેક્સ ક્રેડિટ ટ્રાન્સફર થઈ જાય તેવી વ્યવસ્થા કરી હતી.આ રીતે બેચાર ખાતાઓમાં નાણાં ફરીને આખરે એક ખાતામાંથી રોકડેથી તેનો ઉપાડ કરી લેવામાં આવતો હતો.રોકડમાં નાણાંનો ઉપાડ કરીન ેલાભાર્થી વેપારીઓને પણ તે નાણાં પહોંચાડવામાં આવતા હતા.આંગડિયા મારફતે પણ વેપારીઓને પૈસા મોકલી આપવામાં આવતા હતા.આ કૌભાંડનો મુખ્યસૂત્રધાર મોહમ્મદ ટાટા છેલ્લા એક વર્ષથી વધુ સમયથી નાસતો ફરતો હતો.તે વિદેશ ન ભાગી જાય તે માટે લૂક આઉટ નોટિસ પણ કાઢવામાં આવી હતી.ગઈકાલે તે અમદાવાદ હોવાની બાતમી મળી હતી.તેને આધારે રાતના ૯.૧૫ કલાકે તેની ધરપકડ કરી હતી.આ કેસમાં પણ કહેવાતી રૂ. ૬૦ કરોડની રિકવરી કોની પાસે કરવામાં આવી તેની ફોડ અધિકારીઓને વારંવાર પૂછવા છતાંય વિગતો આપી નહોતી.
