– આગામી 26 સપ્ટેમ્બરે અમદાવાદની મુલાકાત લેશે
– અમદાવાદ મનપાના રૂ. 237 કરોડના વિકાસ કામોની ભેટ શહેરીજનોને આપશે
– અમિત શાહ અમદાવાદના ભાડજ સર્કલના બ્રિજનું લોકાર્પણ કરશે
ગુજરાત વિધાનસભાની ચૂંટણી નજીક આવતાની સાથે પ્રધાનમંત્રી મોદી અને કેન્દ્રિય ગૃહમંત્રી અમિત શાહે રાજ્યના પ્રવાસો તેજ કરી દીધા છે.જેને પગલે આગામી 26 સપ્ટેમ્બરે ફરી એક વખત અમિત શાહ અમદાવાદની મુલાકાતે આવી રહ્યા છે.આ મુલાકાતમાં તેઓ અમદાવાદ મહાનગરપાલિકાના રૂ.237 કરોડના વિકાસલક્ષી કાર્યોનું લોકાર્પણ અને ખાતમુહૂર્ત કરશે.પ્રાથમિક વિગતો અનુસાર નવરાત્રીના પહેલા નોરતે એટલે કે 26 સપ્ટેમ્બરના દિવસે ગૃહમંત્રી અમિત શાહ અમદાવાદના પ્રવાસે આવનાર છે.જેમાં તેઓ AMC ના રૂ.237 કરોડ વિકાસલક્ષી કાર્યોની ભેટ આપશે. જેમાં અમિત શાહ અમદાવાદના ભાડજ સર્કલના બ્રિજનું લોકાર્પણ કરશે.અમિત શાહ જોધપૂર વોર્ડમાં ઝોન ઓફિસનું લોકાર્પણ કરશે,જ્યારે સરખેજ વોર્ડમાં શકરી તળાવનું ખાતમુહૂર્ત કરશે.
આ ઉપરાંત સરખેજ વોર્ડમાં 2140 આવાસોનું પણ અમિત શાહ ખાતમુહૂર્ત કરશે.થલતેજ વોર્ડમાં આવેલા શિલાજીત તળાવના વિકાસનું અમિતશાહના હસ્તે ખાતમુહૂર્ત કરાશે.મહત્વનું છે કે, અમિત શાહના કાર્યક્રમને પગલે તાબડતોબ કામગીરી શરૂ કરવામાં આવી છે.ગૃહમંત્રી અમિત શાહના આ પ્રવાસને પગલે ભાજપ દ્વારા પણ તડામાર તૈયારીઓ કરવામાં આવી રહી છે.ઉલ્લેખનીય છે કે આ મુલાકાત દરમિયાન અમિતશાહ જંગી સભાને પણ સંબોધન કરશે તેવી શક્યતાઓ છે.
