– ભાજપ પ્રદેશ પ્રમુખ સી.આર. પાટીલ સ્ટેજ પર બોલી રહ્યા હતા
– કાર્યકરો દ્વારા લોકોને રોકવા લાકડીનો ઉપયોગ કરતો વીડિયો વાયરલ
– સભામંડપમાં મોટા ભાગની ખુરશીઓ ખાલી પડી હતી
વિધાનસભાની ચૂંટણી નજીક આવતા બેઠકો અને સભાનો દોર શરૂ થયો છે.વડાપ્રધાનથી લઈ મુખ્યમંત્રી અને પ્રદેશ પ્રમુખ અલગ- અલગ જિલ્લા અને તાલુકાની મુલાકાત લેતા જોવા મળી રહ્યા છે.તેવામાં પ્રેદશપ્રમુખ સી.આર.પાટીલનો સભા સંબોધતો એક વીડિયો સામે આવ્યો છે.જેમાં કાર્યકરો દ્વારા લોકોને બેસાડી રાખવા લાકડીનો ઉપયોગ કરાયો હોવા છતાં લોકો ત્યાં બેસવા તૈયાર ન હોય તેમ દેખાઈ રહ્યું છે.
ગુજરાતમાં ચાલુ વર્ષે યોજાનાર ચૂંટણીને લઈને તમામ રાજકીય પાર્ટીઓએ તૈયારીઓ શરૂ કરી દીધી છે.જેમાં મુખ્યમંત્રી અને પ્રદેશ પ્રમુખ વિવિધ કાર્યક્રમોમાં હાજરી આપી પ્રચાર પ્રસાર કરતા જોવા મળે છે.છેલ્લા દિવસોથી પ્રદેશ પ્રમુખ સી.આર.પાટીલ સભા યોજી રહ્યા છે.તેમજ કચ્છ સુરેન્દ્રનગરની મુલાકાત પણ લઈ ચૂક્યા છે.આ દરમિયાન મોટા પ્રમાણમાં લોકોની ભીડ તેમને સાંભળવા તેમજ જોવ માટે ઉમટી પડતી હતી પરંતુ, સી.આર.પાટીલના સભામંડપનો એક વીડિયો સામે આવ્યા બાદ તમામ લોકોને આશ્ચર્ય થવા લાગ્યો છે.એક તરફ સી.આર.પાટીલના કાર્યક્રમોમાં હજારો લોકોની ભીડ જોવા મળ છે.જ્યારે બીજી બાજુ આ વીડિયોમાં લોકોને સભામંડપમાં પરાણે બેસાડવામાં આવતા હોવાનું જોવા મળી રહ્યું છે.
સોશિયલ મીડિયામાં વાયરલ થયેલો આ વીડિયો રાજકોટના ગોંડલનો છે.જેમાં જોઈ શકાય છે કે, પ્રદેશ પ્રમુખ સી.આર.પાટીલ માઈકની સામે ઉભા છે.જ્યાં તેમની પાછળ કેટલાક કાર્યકરો બેસી રહેલા જોવા મળી છે.બીજી બાજુ સભામંડપમાં અડધાથી વધારે ખુરશીઓ ખાલીખમ જોવા મળી રહી છે.માત્ર મહિલાઓની સંખ્યા જ વધારે જોવા મળી રહી છે.એટલું જ નહિ વીડિયોમાં જોઈ શકાય છે કે પ્રદેશ પ્રમુખ સ્ટેજ પર બોલી રહ્યા છે.પરંતુ પાછળ કેટલાક લોકો સભામંડપમાંથી બહાર જઈ રહ્યા છે.જેમને રોકવા માટે કાર્યકરો દ્વારા લાકડીઓનો ઉપયોગ કરવામાં આવે છે.કાર્યકરો દ્વારા લાકડી બતાવી લોકોને બેસવનું કહેવામાં આવતું હોવાનું વીડિયોમાં દેખાઈ રહ્યું છે.તેમ છતાં કેટલાક લોકો સભામંડપની બહાર જતા જોવા મળી રહ્યા છે.
અત્રે ઉલ્લેખનીય છે કે, ગુજરાતમાં અઢી દાયકાથી વધારે ભાજપનું શાસન છે અને સત્તાવિરોધી લહેર મહત્વનું પરિબળ બની જાય છે.ત્યારે આ વખતે જંગ ફકત ભાજપ અને કોંગ્રેસ પૂરતી નથી.આ વખતે અરવિંદ કેજરીવાલની આમ આદમી પાર્ટી પણ આક્રમક તૈયારીઓ કરી રહી હોવાનું સામે આવ્યું છે.તેવામાં આ વીડિયો વાયરલ થતા ભાજપનું જોર ઓછું થતું દેખાઈ રહ્યું છે.
