રેઇન બસેરા – પથિકાશ્રમ જેવા ક્વોરન્ટાઇન સેન્ટરોમાં ઓબ્ઝર્વેશન હેઠળ રહેલા લોકોને ઘરથી પણ વિશેષ સુવિધાઓ – ટીવી, કેરમ, બાળકોને રમવા માટે રમકડા અપાયા – જંગલેશ્વરની ત્રણ મસ્જીદોમાં નમાજ અંગે મૌલવીઓને ખાસ માર્ગદર્શન
શહેરના જંગલેશ્વર વિસ્તારમાં કોરોનાનો પોઝીટીવ કેસ મળતાં આ વિસ્તારમાં ગુરુવારથી જ આરોગ્યની ટુકડીઓ ઉતારી દેવાઈ છે. અહીં અંદાજે ૧૦૦ આરોગ્ય કર્મચારીઓની ફોજ કામે લગાડાઈ છે અને ૨૫૦૦૦ જેટલા લોકો અહીં વસે છે, તેઓનો ઘરેઘરે જઈને આરોગ્ય સબંધી સર્વે શરૂ કરાયો છે.
દરમિયાન જે રહેવાસીઓને શંકાસ્પદ દર્દી તરીકે ઓબ્ઝર્વેશનમાં રાખવામાં આવ્યા છે, તેઓ માટે મ્યુનિ. કોર્પોરેશનના નવા રેઇન બસેરામાં તથા પથિકાશ્રમમાં ખાસ ક્વોરન્ટાઇન સેન્ટરો બનાવાયા છે. આ ક્વોરન્ટાઇન સેન્ટરોમાં રહેનારા લોકોને સજા જેવું લાગે નહીં તે માટે તંત્ર દ્વારા ઘરથી પણ વિશેષ સુવિધાઓ અપાઈ રહ્યાનું કલેકટરએ જણાવ્યું. કલેક્ટરે જણાવ્યું કે, આ ક્વોરન્ટાઇન સેન્ટરમાં ડીશ કનેકશન સાથે ચાર ટીવી સેટ, કેરમ જેવી ઇન્ડોર ગેમ્સ, બાળકોને રમવા માટે રમકડા, સાત્વિક ભોજન, આરામદાયક બેડ વગેરેની સુવિધાઓ અપાઈ રહી છે.
દરમિયાન જંગલેશ્વરમાં કોરોનાનું સંક્રમણ વધે નહીં તે માટે જંગલેશ્વર વિસ્તારની ત્રણ મસ્જીદોના મૌલવીઓ સાથે કલેકટરએ બેઠક યોજી તેઓને કોરોના સામે સુરક્ષાના પગલા અંગે માર્ગદર્શન અપાયું હતું. જેમાં બીમાર લોકોને મસ્જીદે નમાજ પઢવા નહીં આવવા અપીલ કરવી. જરૂર પડયે નમાજ બંધ કરવા અથવા વૈકલ્પિક વ્યવસ્થા કરવા અંગે પણ અનુરોધ કર્યો હતો. આમ, જંગલેશ્વરમાં આરોગ્યલક્ષી તમામ જરૂરી પગલાઓ તથા સુરક્ષાના પગલાઓ લેવાઇ રહ્યાનું કલેકટરએ જણાવ્યું હતું.
જંગલેશ્વરમાં ૨૪ કલાક તબીબી સારવાર : બપોર સુધીમાં ૮૦૦ લોકોને દવા અપાઈ
જંગલેશ્વર વિસ્તારમાં કોરોનાનો પોઝીટીવ કેસ જોવા મળતા, સંક્રમણ સામે સાવચેતીનાં પગલાં રૂપે રાજકોટ મહાનગરપાલિકા દ્વારા જંગલેશ્વર વિસ્તારમાં પ્રણામી ચોક ખાતે આવેલું આરોગ્ય કેન્દ્ર ચોવીસે કલાક ખુલ્લું રાખવાનો નિર્ણય કરવામાં આવ્યો છે. જયાં કોઇપણ સમયે નાગરિકોને પ્રાથમિક તબીબી સારવાર અને માર્ગદર્શન મળી રહેશે, તેમ મ્યુનિ. કમિશનર ઉદિત અગ્રવાલે જણાવ્યું હતું. અહીં ચાર મેડિકલ ડિસ્પેન્સરી કાર્યરત કરાયાનું અને બપોર સુધીમાં ૮૦૦ લોકોને દવા અપાઈ હોવાનું જાણવા મળ્યું છે.
મ્યુનિ. કમિશનરે વધુમાં કહ્યું હતું કે, રાજકોટ મહાનગરપાલિકાની આરોગ્ય શાખાની મેડિકલ ટીમો અને મોબાઈલ ટીમો પણ જંગલેશ્વર વિસ્તારમાં સતત રાઉન્ડમાં રહેશે અને નાગરિકોને આવશ્યકતા મુજબ સારવાર અને માર્ગદર્શન પણ આપશે. જો કોઈ નાગરિકને વિશેષ સારવારની આવશ્યકતા જણાશે તો તેમણે સિવિલ હોસ્પિટલમાં પણ મોકલાશે. આ પ્રકારે પ્રણામી ચોક ખાતેના આરોગ્ય કેન્દ્ર ખાતે અને ફિલ્ડ વર્ક માટે પણ મેડિકલ સ્ટાફ સતત ઉપલબ્ધ રહેશે.
