ન્યૂયોર્ક,16 માર્ચ,2022, બુધવાર : રશિયાના અંતરિયાળ પૂર્વી વિસ્તારમાં ૨૦૨૫ કિમી લાંબો કોલયામ હાઇવે દુનિયા ભરમાં જાણીતો છે.વર્ષ 2021માં રશિયાના ઇરકકુટસ્કમાં એક રોડ પરથી માણસોના હાડકા અને કંકાલ મળી આવતા ચકચાર જાગી હતી.હાડકાના હાઇવેથી બદનામ આ સડક પર સમયાંતરે માનવ કંકાલ મળતા રહે છે જે રશિયામાં તાનાશાહ સ્ટાલિનના ક્રુર શાસનનું પ્રતિક સમાન છે.
કેદીઓની મદદથી ૧૯૩૨માં આ રોડનું નિર્માણ કાર્ય પુરુ થયું હતું
વર્ષ ૧૯૩૦ના દસકામાં સોવિયત સંઘમાં સ્ટાલિનના તાનાશાહી શાસન દરમિયાન આ હાઇવે બનાવવાનું શરુ થયું હતું.સેવવોસ્તલાગના મજુર શિબિરના બંધક મજુરો અને કેદીઓની મદદથી ૧૯૩૨માં આ રોડનું નિર્માણ કાર્ય પુરુ થયું હતું.
આ હાઇવે બનાવવામાં ગુલગના ૧૦ લાખ કેદીઓ અને બંધક મજૂરો ઉપરાંત સામાન્ય ગુનેગારો અને રાજકિય અપરાધીઓ પણ હતા.આ કેદીઓમાં કેટલાક એવા પણ હતા જે સોવિયત સંઘના શ્રેષ્ઠ વૈજ્ઞાનિકો પણ હતા.આમાં રોકેટ વૈજ્ઞાનિક સર્ગેઇ કોરોલેવ પણ હતા.સદ્નસીબે તેઓ જીવતા રહયા અને ૧૯૬૧માં રશિયાને અંતરિક્ષમાં પ્રથમ માણસ મોકલવાનું બહુમાન અપાવ્યું હતું.
પહેલા કોલયામા સુધી માત્ર સમુદ્ર કે પ્લેનના રસ્તે જ પહોંચી શકાતું હતું.
એવું માનવામાં આવે છે કે અત્યંત ઠંડી સિઝનમાં બરફ જામી જવાથી ગાડીઓ ફસાઇ જતી હોય છે.ગાડીઓ ના ફસાય તે માટે રેત સાથે માણસના હાડકા ભેળવીને નાખવામાં આવ્યા છે.હાઇવે નિર્માણની આ એક એવી ઘટના છે જેમાં ૨.૫ થી માંડીને ૧૦ લાખ લોકોએ જીવ આપ્યા હતા.આ હાઇવે પશ્ચિમમાં નિઝને બેસ્ટયાખની પૂર્વમાં મગડાનને જોડે છે.એક સમય એવો પણ હતો કે કોલયામા સુધી માત્ર સમુદ્ર કે પ્લેનના રસ્તે જ પહોંચી શકાતું હતું.
કાંટાળી તારના બીજા છેડે કેદીઓને એકઠા કરીને ગોળીઓથી વિંધવામાં આવતા
મહાન રશિયન કવિ વરલમ શલમોવ જેમણે કોલયમા કેમ્પમાં ૧૫ વર્ષ જેલની સજા ભોગવી હતી.આ કવિએ કેમ્પમાં જોવા મળતી ક્રુરતા અંગે લખ્યું હતું કે ત્યાં માણસ કરતા તો કુતરા અને રીંછ વધારે સારો વ્યહવાર કરતા હતા.અત્યંત ઠંડી,ભૂખ તરસ અને માર પડવાથી માણસ જાનવર બની જતો હતો.કાંટાવાડા તારના બીજા છેડે કેદીઓને એકઠા કરીને ગોળીઓ મારવામાં આવતી હતી.
કેદીઓના મૃતદેહને આ સડક નિર્માણમાં જ દફન કરવામાં આવતા હતા.આ વિસ્તારમાં મોકલવામાં આવતા કેદીઓમાંથી માત્ર ૨૦ ટકા પાછા આવતા હતા.જે યાતનાવાળી શિબિરમાં કેટલાક ભાગવાનો પ્રયાસ કરતા પરંતુ ભાગીને પણ માંડ બે સપ્તાહ સુધી જીવી શકતા હતા.મોટે ભાગે ઠંડી કે ભૂખથી મરી જતા અથવા રીંછના હુમલાનો ભોગ બનતા હતા.રશિયામાં લોકો આ હાઇવે ને બોન હાઇવે તરીકે ઓળખાય છે. તેના કેટલાક સ્પોટ બ્લેક ટુરિઝમ માટે પણ જાણીતા છે.
