મુંબઇ : બોલીવુડના સુપરસ્ટાર સલમાન ખાન અને તેના પિતા સલીમ ખાનને જાનથી મારી નાખવાની ધમકી આપતો પત્ર મળ્યા બાદ મહારાષ્ટ્રના ગૃહ વિભાગે આજથી જ તેમની સુરક્ષા વધારી દીધી છે. મુંબઇના ઉચ્ચ પોલીસ અધિકારીઓની ટીમ આજે સલમાન ખાનના નિવાસસ્થાને પહોંચી હતી તેમ જ પાર્કમાંથી ધમકીપત્ર મળ્યો હતો તેની પણ મુલાકાત લઇને સ્થિતિનો તાગ મેળવ્યો હતો.જોકે,સલમાન ખાન બાદમાં કભી ઈદ કભી દિવાલી ફિલ્મના શુૂટિંગ માટે પચ્ચીસ દિવસના શિડયુલના ભાગરુપે હૈદરાબાદ જવા રવાના થઈ ગયો હતો.
મુંબઇના જોઇન્ટ પોલીસ કમિશનર વિશ્વાસ નાંગરે પાટીલ,ડેપ્યુટી પોલીસ કમિશનર મંજુનાથ શિંગે તેમજ અન્ય પોલીસ ઓફિસરોની ટીમે બાંદરા બેન્ડ-સ્ટેન્ડ પર આવેલા સલમાન ખાનના નિવાસસ્થાન ગેલેક્સી એપાર્ટમેન્ટની મુલાકાત લીધી હતી.તેમણે સલીમખાન અને સલમાનનું સ્ટેટમેન્ટ લીધું હતું.સલમાન ખાનના પિતા અને એક જમાનાના મશહૂર સ્ક્રિપ્ટ રાઇટર સલીમખાન ગઇ કાલે સવારે હંમેશની જેમ સવારે બેન્ડ-સ્ટેન્ડના પાર્કમાં ફરવા ગયા હતા.સાથે તેમના બોડીગાર્ડ પણ હતા.પાર્કમાં એક્સરસાઇઝ કરીને બેન્ચ પર બેઠા ત્યાં પત્ર પડેલો જોયો હતો.પત્ર ખોલીને વાંચતા એમાં સલમાન ખાન અને સલીમ ખાનને જાનથી મારી નાખવાની ધમકી આપવામાં આવી હતી.એમાં લખેલું હતું કે થોડા દિવસ પહેલાં પંજાબના સિંગર સિધુ મૂસેવાલાને ઠાર મારવામાં આવ્યો હતો એવી જ દશા તમારી કરવામાં આવશે.આ ધમકીપત્ર સલીમખાને બાંદરા પોલીસને હવાલે કરી દીધો હતો.પોલીસે અજ્ઞાાત વ્યક્તિ સામે ગુનો નોંધી ધમકી આપનારનું પગેરું મેળવા ચક્રો ગતિમાન કર્યા છે.પાર્કની આસપાસની સોસાઇટીના સીસીટીવી કેમેરામાં ઝડપાયેલા દ્રશ્યોને પણ પોલીસ તપાસી રહી છે.દરમિયાન સિધુ મૂસેવાળાની હત્યા થયા પછી સલમાનની સલામતી વધારે દેવામાં આવી હતી.કારણ અગાઉ સિધુની હત્યામાં જેનો હાથ મનાય છે એ ગેંગસ્ટર લોરેન્સ બિશ્નોઇએ સલમાનને પણ ધમકી આપી હતી.
