નમસ્તે ટ્રમ્પ: મોટેરા સ્ટેડિયમ બનાવનારા વ્યક્તિને જ કાર્યક્રમમાં આમંત્રણ નહીં

બીસીસીઆઈના પૂર્વ ઉપઅધ્યક્ષ મૃગેશ જયકૃષ્ણને અમદાવાદના મોટેરા સ્ટેડિયમમાં યોજાયેલા ‘નમસ્તે ટ્રમ્પ’ કાર્યક્રમ માટે આમંત્રિત કરવામાં નથી આવ્યા. આજે વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ માટે ભવ્ય કાર્યક્રમનું આયોજન કરવામાં આવ્યું છે. મૃગેશ જ એ વ્યક્તિ છે કે જેણે 1983માં ફક્ત આઠ જ મહિનાની અંદર મોટેરા સ્ટેડિયમને બનાવીને તૈયાર કર્યું હતું. આ કાર્યક્રમમાંથી તેમને દૂર રાખવામાં આવ્યા હોવાનું તેમને દુ:ખ છે.

મૃગેશે જણાવ્યું કે, સોમવારે યોજાયેલા ‘નમસ્તે ટ્રમ્પ’ કાર્યક્રમ માટે મને આમંત્રણ આપવામાં નથી આવ્યું. તેઓ બીસીસીઆઈના ઉપાધ્યક્ષ ઉપરાંત ગુજરાત ક્રિકેટ અસોસિએશનના પણ ઉપાધ્યક્ષ તરીકેની ફરજ બજાવી ચૂક્યા છે. નોંધનીય છે કે અમદાવાદના આ સ્ટેડિયમને દુનિયાનું સૌથી મોટું સ્ટેડિયમ માનવામાં આવી રહ્યું છે. તેમાં 1.10 લાખ દર્શકો બેસી શકે તેવી બેઠકવ્યવસ્થાનું આયોજન કરવામાં આવ્યું છે.

37 વર્ષ અગાઉ આ સ્ટેડિયમ ફક્ત 63 એકર ફેલાયોલો ઉબડ-ખાબડ જમીનનો ટુકડો હતો. 76 વર્ષીય મૃગેશે કહ્યું કે, ‘પહેલા આ સ્ટેડિયમને અમદાવાદ નગર નિગમ અને જીસીએ કન્ટ્રોલ કરતા હતા અને તેને ભાડે પણ આપવામાં આવતું હતું. તેની સામે અમારે અધિકારીઓને મફતમાં પાસ આપવા પડતા હતા. તેનાથી કંટાળીને મેં એક નવા સ્ટેડિયમનું નિર્માણ કરવાનો પ્રસ્તાવ રજૂ કર્યો હતો.

મૃગેશ જમીન ફાળવણીનો પ્રસ્તાવ લઈને તત્કાલીન મુખ્યમંત્રી માધવસિંહ સોલંકી પાસે પહોંચ્યા હતા. મુખ્યમંત્રી સોલંકીએ તેમનો પ્રસ્તાવ જોઈને મોટેરા સ્ટેડિયમના નિર્માણ માટે તેમને જમીનની ફાળવણી કરી હતી. વિપક્ષ આ સ્ટેડિયમ બનાવવાની વિરુદ્ધમાં હતું તેમ છતા પણ તેઓ મારા આ પ્રસ્તાવ સાથે ઉભા રહ્યા હતા. તત્કાલીન રાષ્ટ્રપતિ જ્ઞાની જૈલ સિંહે સ્ટેડિયમનું ભૂમિ પૂજન કર્યું હતું. આ સ્ટેડિયમ ફક્ત આઠ મહિના અને 13 દિવસમાં તૈયાર કરી દેવામાં આવ્યું હતું.