એવી સ્થિત ન સર્જતા કે દેખો ત્યાં ઠાર કરવાના આદેશ આપવા પડેઃ તેલંગાણા CM
એજન્સી, નવી દિલ્હી
દેશભરમાં કોરોના વાયરસના કારણે લોકડાઉન જાહેર કરી દેવામાં આવ્યું છે. આગામી 21 દિવસ સુધી સમગ્ર દેશમાં લોકોએ ઘરની અંદર જ રહેવું પડશે. જ્યાં સુધી અત્યંત જરૂરી કામ ન હોય ત્યાં સુધી ઘરની બહાર જવાનું ટાળવું. જો કોઈ જરૂરી કામ વગર પોતાના ઘરની બહાર જોવા મળશે તો તેને એક મહિનાથી બે વર્ષ સુધીની જેલની સજા સંભળાવવામાં આવી શકે છે. આ ઉપરાંત તેલંગાણાના મુખ્યમંત્રી ચંદ્રશેખર રાવે આકરા શબ્દોમાં ચેતવણી આપતા લોકોને કહ્યું કે જનતા એવી પરિસ્થિતિનું નિર્માણ ન કરે કે તેમને દેખતા જ ગોળી મારવાના આદેશ આપવા પડે.
21 દિવસના લોકડાઉન દરમિયાન નિયમ અને ગાઈડલાઈન્સનું પાલન નહીં કરનારા લોકો પર કલમ 51 અંતર્ગત કાર્યવાહી કરવામાં આવશે. જેમાં સજા અને દંડ બંનેની જોગવાઈ કરવામાં આવી છે. લોકડાઉનના નિયમોનો ભંગ કરનારા લોકોને 200 રૂપિયાનો દંડ અને એક મહિનાની સજાની જોગવાઈ કરવામાં આવી છે. પરંતુ જો આને કારણે કાયદાકીય વ્યવસ્થામાં કોઈ તકલીફ પડશે અને તોફાનની પરિસ્થિતનું સર્જન થશે તો આ સજાને છ મહિના સુધી વધારી દેવામાં આવશે. ઓર્ડરમાં કહેવામાં આવ્યું છે કે જે વ્યક્તિ લોકડાઉનના આ નિયમોનું પાલન નહીં કરે અને તેને કારણે કોઈની તબિયત બગડશે અથવા તો કોઈનો જીવ જશે અને જો તે વ્યક્તિ દોષિત જાહેર થશે તો આ ગુનામાં તેને બે વર્ષની જેલની સજા થઈ શકે છે.
ગૃહ મંત્રાલય તરફથી જાહેર કરવામાં આવેલા ઓર્ડરમાં કહેવામાં આવ્યું છે કે જો કોઈ પણ વ્યક્તિ કોરોના વાયરસના મામલે કોઈ અફવા ફેલાવતો ઝડપાશે તો તેને એક વર્ષ સુધીની જેલ થઈ શકે છે. આ સાથે જ તેને દંડ પણ ચૂકવવો પડશે. તેમજ લોકોની મદદ માટે આપવામાં આવેલા ફંડમાં જો કોઈ કૌભાંડ સામે આવશે તો સરકારી અધિકારીઓને પર પણ આ જ નિયમો હેઠળ સજા કરવામાં આવશે. સરકારની ગાઈડલાઈનનું પાલન નહીં કરનાર કોર્પોરેટને પણ દંડ કરવામાં આવશે.
21 દિવસના લોકડાઉન પર તેલંગાણાના મુખ્યમંત્રી ચંદ્રશેખર રાવે કડક શબ્દોમાં ચેતવણી આપતા કહ્યું કે, જો લોકો લોકડાઉનના સમયે ઘરની બહાર નીકળશે તો તેમની પાસે તેમને દેખતા જ ઠાર કરવાના આદેશ આપ્યા વગર અન્ય કોઈ વિકલ્પ નહીં રહે. મીડિયા સાથે વાતચીત કરતા તેમણે કહ્યું કે જો લોકડાઉનના આદેશનો લોકો ભંગ કરશે તો મારે 24 કલાકમાં જ કરફ્યૂ લાદી દેવો પડશે. તેમણે તેલંગાણાની જનતાને અપીલ કરી કે મને એવું કરવા પર મજબૂર ન કરતા કે મારેી પાસે દેખતા જ ઠાર કરી દેવાના આદેશ આપ્યા વગર અન્ય કોઈ વિકલ્પ જ ન રહે.
