અમદાવાદ : અલગ અલગ ઝોન તથા રોડ પ્રોજેક્ટના રૂ.536 કરોડના રોડના કામો અંદાજીત ભાવ કરતા 34 ટકા વધુ ભાવે આપવામાં આવ્યા બાદ રૂ.26 કરોડનો ભાવ તફાવત માંગવામાં આવતા વિપક્ષ દ્વારા તેનો વિરોધ કરાયો છે.કોન્ટ્રાક્ટરને અંદાજીત ભાવ કરતા 34 ટકા જેટલા વધુ ભાવે કામ આપ્યા બાદ પણ એક્સ્ટ્રા આઈટમના નામે રૂ.26 કરોડનો ભાવ તફાવત માંગવામાં આવ્યો હોઈ વિપક્ષી નેતા દ્વારા કોન્ટ્રાક્ટરની માગણીને ગેરવ્યાજબી ગણાવી છે.
પ્રાપ્ત માહિતી અનુસાર,અલગ અલગ ઝોન તથા રોડ પ્રોજેક્ટના આર.કે.સી.ઈન્ફ્રાબીલ્ટ પ્રા.લી.ને રૂ.536 કરોડના રોડ કોન્ટ્રાક્ટ અંદાજીત ભાવ કરતા 34 ટકા વધુ ભાવે 30 જાન્યુઆરી,2020ના રોજ આપવામાં આવ્યો હતો.આ વાર્ષિક કોન્ટ્રાક્ટમાં જે તે સમયે સેન્ટ્રલ વર્જ કર્બ,ફુટપાથ કર્બ તેમજ રબર મોલ્ડ પેવર બ્લોક નાખવાના કામો કરવાના હતા.આ વાર્ષિક કોન્ટ્રાક્ટ અંદાજીત ભાવ કરતા 34 ટકા વધુ ભાવે અપાયા હોવા છતાં કોન્ટ્રાક્ટર દ્વારા એક્સ્ટ્રા આઈટમના નામે રૂ.26 કરોડનો ભાવ તફાવત માંગવામાં આવ્યો છે,જેના માટે PMC કીસ્ટોન ઈન્ફ્રાસ્ટ્રક્ચર પ્રા.લી.નો અભિપ્રાય માંગતા તેઓએ ભાવ વધારો મંજુર કરવાનો અભિપ્રાય આપતા ભાવ વધારાની દરખાસ્ત મુકવામાં આવી છે.
આ અંગે વિપક્ષી નેતા શહેજાદ પઠાણે પ્રશ્ન ઉઠાવ્યો હતો અને જણાવ્યું હતું કે,કોન્ટ્રાક્ટર આર.કે.સી.ઈન્ફ્રાબીલ્ટ પ્રા.લી.ને અલગ અલગ ઝોન તથા રોડ પ્રોજેક્ટના રૂ.536 કરોડના કોન્ટ્રાક્ટ અંદાજીત ભાવથી 34 ટકા વધુ ભાવે આપવા પાછળનો હેતુ સ્પષ્ટ થતો નથી.કોન્ટ્રાક્ટર દ્વારા કરવામાં આવતા મોટાભાગના કામો હજુ અધુરા છે ત્યારે ખાનગી કંપનીના અભિપ્રાય કરતા કોર્પોરેશનના અધિકારીઓ દ્વારા કામોનું સુપરવિઝન કરવું અનિવાર્ય છે.કોંગ્રેસ દ્વારા માંગણી કરવામાં આવે છે કે,સમગ્ર પ્રકરણની યોગ્ય તપાસ કરવામાં આવે અને અંદાજીત ભાવથી 34 ટકા વધુ ભાવે કોન્ટ્રાક્ટ અપાયા પછી તફાવતની માંગણી તદ્દન ગેરવ્યાજબી છે.
