વર્તમાન વૈશ્વિક પડકારોને ઉકેલવામાં ભારતની વિશિષ્ટ ભૂમિકા: IMF

વોશિંગ્ટન : ભારત આગામી વર્ષે જી-૨૦ દેશોની અધ્યક્ષતા કરવાનું છે ત્યારે વૈશ્વિક પડકારોને ઉકેલવામાં તે મહત્વની ભૂમિકા ભજવશે એવો મત IMFના વડાએ ગુરુવારે વ્યક્ત કર્યો હતો.તેમણે કહ્યું હતું કે, તમામ દેશો સાથે સહયોગની ભારતની સર્વસમાવેશી નીતિને કારણે તે વિશ્વના જુદાજુદા ભાગો સુધી પહોંચી શકશે.IMFના એમડી ક્રિસ્ટાલિના જ્યોર્જિવાએ IMFની ઇન્ટરનેશનલ મોનેટરી અને ફાઇનાન્સ કમિટીના અધ્યક્ષ નાદિયા કેલ્વિનોની એક સંયુક્ત કોન્ફરન્સમાં જણાવ્યું હતું કે, “IMF ભારત પાસે એક ખાસ કામ કરાવવા માંગે છે અને એ છે ક્વોટાની ૧૬મી જનરલ સમીક્ષા.આજની બેઠકમાં લગભગ દરેકે આ સમીક્ષા સફળતાપૂર્વક પૂરી કરવાનો મત વ્યક્ત કર્યો હતો અને મને વિશ્વાસ છે કે, ભારત જી-૨૦નું અધ્યક્ષ બનશે ત્યારે આ હેતુ હાંસલ કરવામાં મદદ મળશે.”ઉલ્લેખનીય છે કે, ભારત જી-૨૦ દેશોની અધ્યક્ષતા કરવાનું છે. આ એક શક્તિશાળી મંચ છે, જેમાં ૧૯ દેશ અને યુરોપિયન યુનિયન સામેલ છે.આ દેશોમાં ઓસ્ટ્રેલિયા, કેનેડા, સાઉદી અરેબિયા, અમેરિકા, ભારત, રશિયા, દક્ષિણ આફ્રિકા, તુર્કી, આર્જેન્ટિના, બ્રાઝિલ, મેક્સિકો, ફ્રાન્સ, જર્મની, ઇટલ, બ્રિટન, ચીન, ઇન્ડોનેશિયા, જાપાન અને દક્ષિણ કોરિયાનો સમાવેશ થાય છે.ઇન્ડોનેશિયા જી-૨૦નું વર્તમાન અધ્યક્ષ છે.જ્યોર્જિવાએ જણાવ્યું હતું કે, “આ એક સારો યોગાનુયોગ છે કે બે મોટા ઊભરતા અર્થતંત્રો જી-૨૦ની અધ્યક્ષતા કરી રહ્યા છે.ઊભરતા દેશોની અધ્યક્ષતા લોકોની ગરીબી હટાવવા, અર્થતંત્રને કાર્યક્ષમ બનાવવા તેમજ વૈશ્વિક સહયોગમાં મદદ કરશે.મને વિશ્વાસ છે કે, ભારત જી-૨૦ના મંચનો ઉપયોગ વૈશ્વિક સહયોગ માટે કરવામાં આપણી મદદ કરશે.” જી-૨૦ની બેઠકમાં કેલ્વિનોએ જણાવ્યું હતું કે, “ભારત આગામી વર્ષે જી-૨૦ની અધ્યક્ષતા કરશે ત્યારે ક્લાઇમેટ ચેન્જ, સૌથી નબળા દેશોને સહાય જેવી સમાન પ્રાથમિકતાઓ માટે કામ કરી શકાશે.”