– 15 એપ્રિલે મુદત પૂરી થઈ રહેલી 2350 ગ્રામપંચાયતમાં ચૂંટણીના બદલે વહીવટદાર નીમવાની હિલચાલ
ગાંધીનગર : આગામી 15 એપ્રિલે રાજ્યની 2300થી વધુ ગ્રામપંચાયતની ચૂંટણીઓની મુદત પૂરી થઈ રહી છે.આ ઉપરાંત ગત નવેમ્બરમાં વિભાજનથી અસ્તિત્વમાં આવેલી 500થી વધુ ગ્રામ પંચાયતોમાં પણ ચાર મહિનાથી ચૂંટણી થઇ શકી નથી.પરિણામે કુલ મળીને 2,852 ગ્રામપંચાયતોની સામાન્ય ચૂંટણી એપ્રિલ ત્રીજા-ચોથા સપ્તાહે આયોજિત કરવાની થાય છે,પણ ચૂંટણી નહીં યોજીને ત્યાં વહીવટદારોની નિમણૂક કરવાની દિશામાં સરકાર વિચારણા કરી રહી હોવાનું જાણવા મળ્યું છે.
આ ઉપરાંત રાજ્યની 500 ગ્રામપંચાયત કે જ્યા સરપંચ સહિતના સદસ્યોની મુદત પૂરી થઈ ગઈ છે.તેવી પંચાયતોમાં પણ છ મહિના માટે વહીવટદાર નીમવામાં આવી શકે છે.અને આ માટે પણ જિલ્લા તંત્રને તૈયાર રહેવા માટે મૌખિક સુચના આપવામાં આવી હોવાનું જાણવા મળ્યું છે.તો બીજી તરફ ગુજરાત વિધાનસભાની વહેલી ચૂંટણીઓના વહેતા થયેલા સંકેતોમાં એવું તારણ કાઢવામાં આવી રહ્યું છે કે ગુજરાત સરકાર ખાલી પડેલી ગુજરાત વિધાનસભાની પેટાચૂંટણીઓ પણ નહીં યોજીને સાથે સાથે પંચાયતની ચૂંટણીઓ પણ મુલતવી રાખવામાં આવી શકે છે.
ગુજરાતમાં વિધાનસભાનું બજેટસત્ર પૂરું થતા જ વહીવટી તંત્રમાં થઈ રહેલા ધરખમ ફેરફારો અને ઉચ્ચ અધિકારીઓની બદલીઓ તેમજ અન્ય કેટલાક વહીવટી નિર્ણયો વિધાનસભાની વહેલી ચૂંટણીઓ બાબતને સ્પષ્ટ સંકેત આપી રહ્યા હોવાનું ચર્ચાઈ રહ્યું છે.રાજ્યમાં રાજકીય પક્ષો પણ ફાસ્ટ્રેક મોડ પર ચૂંટણીની તૈયારી કરી રહ્યા છે,ભાજપ દ્વારા ટિફિન બેઠકોનો ધમધમાટ શરૂ થયો છે.આ ઉપરાંત રાજકીય નેતાઓની તબક્કાવાર થતી ડિનર ડિપ્લોમસી ઉપરાંત ભાજપ પ્રદેશ પ્રમુખ પાર્ટી નો વનડે વન ડિસ્ટ્રિક્ટ કાર્યક્રમ સહિત અન્ય ગતિવિધિઓ ચૂંટણી સંદર્ભે ઘણા બધા સંકેતો આપી રહ્યાનું રાજકીય વર્તુળોમાં ચર્ચાઈ રહ્યું છે.
