અમદાવાદ : ગુજરાતમાં વિધિવિત ચોમાસાનું આગમન થઈ ગયું છે.રાજ્યના વિવિધ વિસ્તારોમાં હાલ સારો વરસાદ પડી રહ્યો છે.હવામાન વિભાગે આગામી ચાર દિવસ માટે વરસાદની આગાહી કરી છે. હવામાન વિભાગ તરફથી રાજ્યમાં સામાન્ય વરસાદની તો અમુક વિસ્તારોમાં ભારે વરસાદની આગાહી પણ કરવામાં આવી છે.હવામાન વિભાગે સૌરાષ્ટ્ર અને દક્ષિણ ગુજરાતના કેટલાક વિસ્તારોમાં ભારે વરસાદની આગાહી કરી છે.બીજી તરફ હાલ રાજ્યના અનેક વિસ્તારોમાં વાવણી લાયક વરસાદ વરસી ગયો છે.જેના કારણે ખેડૂતોએ રાહતનો શ્વાસ લીધો છે.નોંધનીય છે કે,વરસાદની આગાહી વચ્ચે અમદાવાદનું તાપમાન 39 ડિગ્રી પર પહોંચી ગયું હતું.જ્યારે હવામાં ભેજનું પ્રમાણ સવારે 71 અને સાંજે 51 ટકા જેટલું ઊંચુ નોંધાતા લોકો પરસેવે રેબઝેબ થયા હતા.જો કે,મોડી સાંજે ઠંડો પવન ફૂંકાતા લોકોને રાહત મળી હતી.
હવામાન વિભાગે આગાહી કરતા જણાવ્યું છે કે,સતત નૈઋત્ય ચોમાસુ આગળ વધી રહ્યું છે.હાલ નૈઋત્ય ચોમાસુ આગળ વધે તેવી સાનુકૂળ પરિસ્થિતિ છે જેના કારણે રાજ્યમાં વરસાદ થાય તેવી શક્યતાઓ છે. આ ઉપરાંત રાજસ્થાન તથા અરબી સમુદ્ર પર સાયક્લોનિક સરક્યુલેશન સર્જાયું છે જેની અસરને કારણે પણ સારો વરસાદ થવાની વકી છે.હવામાન વિભાગે શુક્રવારે સૌરાષ્ટ્રના અમરેલી અને ભાવનગરમાં ભારે વરસાદની આગાહી કરી છે.આ ઉપરાંત આગામી ચાર દિવસ દરમિયાન ભારે પવન સાથે અમદાવાદ,ખેડા,આણંદ,ગાંધીનગર,બનાસકાંઠા,સાબરકાંઠા,પાટણ,મહેસાણા,ભરૂચ,સુરત,વલસાડ,વડોદરા,નર્મદા, તાપી,નવસારી,રાજકોટ,પોરબંદર,જૂનાગઢ,અમરેલી,આણંદ,પંચમાહલ,દાહોદ સહિતના વિસ્તારમાં વરસાદની વકી છે.હવામાન વિભાગના ડાયરેક્ટર મનોરમા મોહંતીએ પત્રકારોને જણાવ્યું હતું કે,શુક્રવારે કેટલીક જગ્યાએ ભારે વરસાદ પડી શકે છે.ચાર દિવસ રાજ્યમાં વરસાદ રહેશે.અમદાવાદમાં વાદળછાયું વાતાવરણ બનેલું રહેશે.સાંજે અને રાત્રે થન્ડરસ્ટોર્મ એક્ટિવિટી જોવા મળી શકે છે.
