– માલધારી સમાજે કોંગ્રેસ પક્ષને સમર્થન જાહેર કર્યું
– સરકારનો માલધારીઓ સાથે આતંકવાદી જેવો વ્યવહાર હોવાનો આરોપ
આગામી વિધાનસભા ચૂંટણીઓ નજીક આવી રહી છે.ત્યારે હવે માલધારી સમાજે પણ ધોકો પછાડ્યો છે.અને એક પત્રકાર પરિષદ યોજી ભાજપ સરકાર સામે ગંભીર આરોપો લગાવ્યા છે.સરકારનો માલધારીઓ સાથે આતંકવાદી જેવો વ્યવહાર હોવાનો ગંભીર આરોપ પણ માલધારી સમાજે લગાવ્યો છે.આ સાથે પોતાની વિવિધ માંગો દોહરાવી છે.અને જો આ માંગ નહીં સંતોષાય તો તેની અસર આગામી ચૂંટણીનાં પરિણામમાં પડશે તેવી ચેતવણી આપી કોંગ્રેસ પક્ષને સમર્થન જાહેર કર્યું છે.
જાણવા મળતી વિગત મુજબ, આજરોજ માલધારી સમાજ દ્વારા વિવિધ પડતર માંગણીઓને લઈ પત્રકાર પરિષદનું આયોજન કરાયું હતું.જેમાં ઘર પાસેથી ગયો પકડવી,પશુપાલકોને માર મારવો,માલધારી યુવાનોને પાસા કરવી,માલધારી વસાહતની જાહેરાત કરી પણ આપી નથી,દંડ વધારે વસૂલ કરવો અને ગાયો પાછી ન આપવી સહિતના અનેક આરોપ ભાજપ સરકાર પર લગાવવામાં આવ્યા હતા.સાથે જ જો સરકાર આ મુદ્દે ગંભીર નહીં થાય તો સમગ્ર રાજ્યમાં માલધારી સમાજ દ્વારા ભાજપ વિરુદ્ધ મતદાન કરવાની ચીમકી અપાઈ હતી.આ તકે માલધારી સમાજનાં અગ્રણી હિરેન ચાવડીયા દ્વારા કોંગ્રેસનો ખેસ ધારણ કરાયો હતો.અને તેઓએ જણાવ્યું હતું કે, ગુજરાતની ભાજપ સરકાર માલધારી સમાજ ઉપર અત્યાચાર કરી રહી છે.આ સરકાર દ્વારા માલધારીઓ સાથે આતંકવાદી જેવો વ્યવહાર કરવામાં આવે છે.જેમાં ગાયના માલિકને અને ગાયને મારવામાં આવે છે તેમજ ગાય માલિકને પાસા કરવામાં આવે છે.જેને લઈને માલધારી સમાજ દ્વારા આગામી ચૂંટણીમાં કોંગ્રેસને સાથ આપવાનો નિર્ણય લેવાયો છે.
ઉલ્લેખનીય છે કે, તાજેતરમાં ભાજપનાં દિગ્ગજ નેતા વજુભાઇ વાળાએ કચ્છ ખાતે આપેલા નિવેદનને લઈ દલિત સમાજમાં નારાજગી છે.જ્યારે કડીયા સમાજે પણ તાજેતરમાં દક્ષિણ બેઠકમાં રોષ વ્યક્ત કર્યો હતો.અને હવે માલધારી સમાજમાં પણ રોષ જોવાઈ રહ્યો છે.તેમજ માલધારી સમાજે દક્ષિણ વિધાનસભા મત વિસ્તારમાં કોંગ્રેસ સાથે રહી રોષ ઠાલવ્યો છે.ત્યારે આગામી ચૂંટણીમાં ખાસ દક્ષિણ બેઠક પર ભાજપની મુશ્કેલીઓ વધે તેવી શક્યતાઓ નકારી શકાય તેમ નથી.
